Til merekesi qarsańynda halyqaralyq «Qazaq tili» qoǵamy Soltústik Qazaqstan fılıalynyń tóraǵasy Janat Muhamedjanovqa jolyqqan edik. Ol oblystyń ıdeologııalyq turǵydan eskirgen ataýlardy ıelengen 25 aýyl-selolarǵa jaqynda ǵana baryp, memlekettik onomastıkalyq saıasatty túsindirip qaıtqanyn aıtty.
Aıtýynsha, kóptegen turǵyn bul iske túsinistikpen qaraǵanymen, keıbir qyryn qaraıtyndar da jeterlik. Aımaqta Petrovka, Pokrovka, Nıkolaevka, Bogolıýbovo, Spassovka, Nıkolsk, Svıatodýhovka sııaqty dinı, Pýlemetovka, Partızan, Komıntern, Pıoner, Komsomol sııaqty tóńkeris uǵymdaryn jáne ony jasaǵan Chapaev, Lenın, Kýıbyshev, Kırov sııaqty, ataýlar samsap tur.
«Qazaq tili» qoǵamynyń belsendileri aldynda jasalǵan jumys týraly esep bergen Janat Muhamedjanov oblys ákiminiń jańa taǵaıyndalǵan áleýmettik máselelerdi baqylaıtyn orynbasary Júsip Jumaǵulovqa osy máselelerdi jetkizip, ony sheshý boıynsha usynys jasaıtynyn aıtty.
Jıynǵa qatysýshylardyń bári bul usynysty biraýyzdan qoldady. Sonymen birge ol Prezıdent Qasym-Jomart Toqaevqa oblys ataýyn «Qyzyljar» dep ataýdy usynys hat retinde joldaýdyń mańyzdylyǵyn aıtty.
Qazir Soltústik Qazaqstanda «Qazaq tili» qoǵamynyń fılıaly – memlekettik tildiń damýyna qyzmet etip júrgen birden-bir qoǵamdyq uıym. Onyń túrli usynysy men pikirin, ókinishke qaraı, jergilikti bıliktegi memlekettik tildi bilmeıtin sheneýnikter elemeýge, kózge ilmeýge tyrysyp, keıde tipti kedergiler jasap baǵady. «Qazaq tili» qoǵamynyń jumysyn qoldar degen bar úmit ákimniń jańadan taǵaıyndalǵan áleýmettik máseleler jónindegi orynbasarynda. Qoǵam belsendileri onyń qabyldaýyna jazylaıyq degen sheshimge keldi.
PETROPAVL