«El bolam deseń, besigińdi túze» dep ata-babamyz tegin aıtpaǵan. Qaı elde bolsyn, qaı zamanda bolsyn el bolashaǵy jastardyń qolynda ekeni anyq.
Ul balany erteńgi otbasynyń tiregi, qorǵaýshysy, asyraýshysy, qartaıǵan shaqta áke-sheshesiniń qamqorshysy dep, al qyz balany bolashaq ana, ınabatty kelin, adal jar, otbasynyń uıytqysy dep tárbıelegen. Osyndaı ulttyq tárbıe mánin ata-ájelerimiz «Ulǵa otyz úıden, qyzǵa qyryq úıden tyıym» degen bir maqalmen túıindegen.
Memleket basshysy Qasym-Jomart Toqaev Ulttyq quryltaı otyrysynda bolashaqqa senimmen qadam basý úshin «Tól tarıhymyzdyń aýqymy keń ekenin tolyq sezinip, mádenı muramyzdy saqtap, ony dáripteýimiz qajet», dep atap ótken edi. Elimizdiń ótkeni, búgini men bolashaǵy onyń tarıhı murasymen, ulttyq qundylyqpen, salt-dástúrimizben tyǵyz astasyp jatqany aqıqat. Bul oıdy Prezıdentimiz bıylǵy Joldaýynda da tarqata aıtty. «Azamattary, ásirese jastary mádenıetti, jańashyl ári jasampaz ulttyń upaıy túgel. Sondyqtan biz órkenıetti el bolýǵa kedergi jasaıtyn jaǵymsyz ádetterden arylýymyz kerek», dedi Memleket basshysy.
Osy maqsat jolynda 30 jyldan asa qyzmet etip júrgen «Nur-ana álemi» qoǵamdyq birlestigi birtalaı sharýa atqardy desem, artyq bolmas. Bizdiń birlestik quramynda ardager ustazdar, mádenıet salasynyń mamandary, kópbalaly analar, nemere-shóbere súıgen ájeler bar. Atap aıtsaq, ájelerimiz balabaqshalar, mektepter, joǵary, tehnıkalyq jáne kásiptik bilim berý, mádenıet salasynyń, balalar tárbıelenetin áleýmettik mekemelermen udaıy tyǵyz baılanysta. Birlestik ájeleri jyl boıy «Ájemniń ertegisi» jobasy aıasynda balabaqsha baldyrǵandaryn qazaq halqynyń ertegileri arqyly otansúıgishtikke, shyndyqqa, eńbekqorlyqqa tárbıeleıdi. Ájesiniń áldıin, ertegisin tyńdaǵan bala meıirimdi, úlkenge qurmet pen qamqorlyq kórsetetin bala bolatynyna senemiz. Sondyqtan da otbasynda ájeler nemerelerin ulttyq qundylyqtar men salt-dástúr negizinde tárbıelese, urpaq jaman qylyqtardan aýlaq bolyp, jaqsylyqqa umtylady.
Jyl saıyn Dostyq úıinde «Nur-ana álemi» qoǵamdyq birlestiginiń ájeleri, din salasynyń mamandary, mektep ustazdary jáne oqýshylardyń qatysýymen ótetin «Din men dástúr» konferensııasy – balalarymyzdy ımandylyqqa, parasattylyqqa tárbıeleıtin, ulttyq qundylyqtardy qalyptastyrýǵa jáne nasıhattaýǵa baǵyttalǵan shara. Buǵan qosa «Qorjyn», «Qaıyrymdylyq», «Mektepke jol» aksııalary sheńberinde múmkindikteri kelgenshe kómekke muqtaj, jetim-jesir otbasylaryna árdaıym qol ushyn berip keledi. Qazaqstan halqy Assambleıasy sheshimderi negizinde túsindirý jumysyn júrgizý, belsendi múshelerdi marapattaý, merekelik konsert kórsetý, erekshe sharalarǵa uıytqy bolý – osynyń barlyǵy ájelerdiń qoǵamdyq qyzmeti.
Memleket basshysy Joldaýynda: «Halqymyz qashan da keń peıilimen, toleranttylyǵymen erekshelengen. Elimizdiń basty qundylyǵy – birlik pen kelisim eń aldymen osy qasıetterdiń arqasynda saqtalyp otyr», dep atap kórsetti. Bul turǵyda bizdiń uıymnyń júrgizip otyrǵan sharýalary da barshylyq. Jyl basynan Pavlodar oblysyndaǵy Qazaqstan halqy Assambleıasynyń Analar keńesi, «Nur-ana álemi» QB, «Qoǵamdyq kelisim» KMM jáne Pavlodar qalasy bilim mekemeleri «Otbasy – tárbıe irgetasy» jobasyn iske asyryp keledi. Osy oraıda uıymdarmen 46 memorandým bekitildi. Joba aıasyndaǵy festıvalǵa 30-ǵa jýyq mektep qatysyp, qazaq halqynyń ádet-ǵurpyn, otbasylyq dástúrler men ulttyq oıyndaryn, ejelgi zamannan qalyptasqan turmys-tirshiligin, jalpy ulttyń mádenı-genetıkalyq bolmysyn kórsete bildi.
Jańa oqý jylynda bul jumys «Kúshimiz – birlikte» baǵytyndaǵy ómirsheń jobamen jalǵasyn tabady. Joba Pavlodar óńirinde turatyn etnos ókilderi salt-dástúri men qazaq ulttyq salt-dástúriniń ıntegrasııa arqyly bite qaınasqanyn kórsetýdi kózdep otyr.
Urpaq tárbıesi – ult bolashaǵy. Bolashaǵymyz jarqyn bolsyn desek, keleshek qoǵam ıelerin jan-jaqty jetilgen, aqyl-parasaty mol, mádenı, ǵylymı órisi ozyq etip tárbıeleý – siz ben bizdiń kezek kúttirmeıtin mindetimiz.
Baqytjamal MAKSILOVA,
Pavlodar oblysy Qazaqstan halqy Assambleıasy Analar keńesiniń jáne «Nur-ana álemi» qoǵamdyq birlestiginiń tóraǵasy