Májilis spıkeri Erlan Qoshanovtyń tóraǵalyǵymen bıýro ótip, aldaǵy jalpy otyrystyń kún tártibi naqtylandy.
Májilistiń qaraýyna taýar bırjalary máseleleri boıynsha zańnamalyq ózgerister birinshi oqylymda engizildi. Tıisti zań jobasy Prezıdenttiń 2023 jylǵy 1 qyrkúıektegi «Ádiletti Qazaqstannyń ekonomıkalyq baǵdary» atty Joldaýyn iske asyrý aıasynda Májilis depýtattarynyń bastamasymen ázirlengen. Zań jobasynda bırjalarǵa qoıylatyn retteýshilik talaptardy qatańdatý, memlekettik baqylaýdy kúsheıtý, sondaı-aq otandyq óndirýshilerdiń ashyq saýda quraldaryna qol jetkizýin qamtamasyz etý usynylady.
Jalpy otyrystyń kún tártibine Qazaqstan men О́zbekstan úkimetteri arasyndaǵy ekologııa jáne qorshaǵan ortany qorǵaý salasyndaǵy yntymaqtastyq týraly kelisimdi ratıfıkasııalaý týraly zań jobasy engizildi.
Buǵan qosa depýtattar «Poshta týraly» zańǵa engiziletin ózgeristerdi jumysqa alady.
Bıýro otyrysynda Májilistiń VIII shaqyrylymdaǵy Qoǵamdyq palata quramyna jańa múshelerdi qosý máselesi de qaraldy jáne depýtattardyń saılaýshylarmen kezdesý úshin óńirlerge saparǵa shyǵýy týraly aqparat tyńdaldy.