Memlekettik qyzmettegi ashyqtyq pen tıimdilik

Memlekettik basqarý isiniń tıimdiligin arttyrý máselesin Memleket basshysy alǵash 2019 jylǵy Joldaýynda kóterip, «Halyq únine qulaq asatyn memleket» tujyrymdamasyn usyn­ǵan edi. Bul ıdeıa «Adam memleket úshin emes, memleket adam úshin» degen irgeli qaǵıda aıasynda kórinis tapty. Joldaýdyń segizinshi baǵytyndaǵy aıtylǵan pikirler de oǵan aıqyn dálel.

Prezıdent Joldaýynda «Qazaq­stan halqy qazir múlde jańa saıası jaǵdaıda ómir sú­rip jatyr. Keıingi 5 jylda aýqymdy reformalar jasaldy. Elimizdiń saıası júıesi túbe­geı­li ózgerdi. Jurttyń sana-sezimin­de betburys bolyp jatyr. Halyq­tyń quqyqtyq mádenıeti artyp keledi», dedi.

«Halyq únine qulaq asatyn memleket» tujyrymdamasy memlekettik apparattyń halyqqa bet burýyna yqpal jasap, eli­mizde jańa saıası mádenıettiń qalyptasýyna jol ashqan, mem­leket basqarý isinde sapaly ózgeriske bastaǵan mańyzdy ıdeıa bolǵanyn kórip otyrmyz. Prezıdent bas­tamasymen qazir memlekettik apparattyń jumysy ashyq, ádil, adamǵa baǵdarlanǵan sıpatta turaqty jańǵyrtylyp jatyr.

Joldaýda qoǵam men bılik qury­lymdary arasyndaǵy qa­rym-qatynas mádenıetiniń óz­gergeni, memlekettik qyz­met­shi­lerdiń azamattarmen tikeleı sóılesýi qalypty jaǵdaıǵa aınalǵany, memlekettik qyzmet­shiler minez-qulqynyń jańa modeli qalyptasqany, olar jaýap­­kershilikpen, proaktıvti, ashyq jáne tıimdi jumys isteı bastaǵany aıtyldy. Bul mem­lekettik qyzmetshilerge aldaǵy ýaqytta da ashyqtyq, ádil­dik qa­ǵı­datyn ustanýdyń mańyz­dylyǵyn kórsetedi.

Osy oraıda Memleket bas­shy­synyń «Memleket pen qo­ǵam arasyndaǵy dıalogtiń sapa­syn odan ári arttyra túsý úshin bárimiz adal ári ádil bolýymyz, tek zań aıasynda áreket etýimiz, bergen ýádemiz ben isimiz úshin jaýap bere bilýimiz kerek» degen pikiriniń memlekettik qyzmetshilerge ma­ńyzy zor.

Osy baǵytta memlekettik qyzmetti ári qaraı júıeli túrde damytý úshin bıyl shilde aıynda elimizde memlekettik qyzmetti damytýdyń 2024–2029 jyldarǵa arnalǵan tujyrymdamasy beki­­til­di. Agenttik muny júzege asyrý aıasynda «Memlekettik qyzmet týraly» jańa zań ázir­leýdi kózdep otyr. Ol mem­lekettik qyzmettiń mıssııasy, min­detteri men talaptaryn ja­ńasha aıqyndaıdy. Bul zań qazirgideı eńbek qatynastaryn, ıaǵnı memlekettik qyzmetke kirý, ótkerý jáne toqtatý máselelerin retteýmen shektelmeı, eń bastysy memlekettik qyzmetshilerdiń minez-qulqynyń adamǵa baǵdar­lanǵan úlgisin bekitedi. Iаǵnı endi memlekettik qyzmetshilerdiń azamattardyń talap-tilekterine qulaq asyp, adamǵa baǵdarlanýy zańmen mindetteledi. Bul mem­lekettik qyzmetshiler men aza­mattardyń qarym-qatynas máde­nıetin jańa deńgeıge kóterýge septigin tıgizedi. Sonymen qatar memleket usynatyn ıgilikter men qyzmetterdiń bıýrokratııasyz, áýre-sarsańsyz qoljetimdiligin qamtamasyz etedi. Osynyń bar­lyǵy ashyqtyq, ádildik qaǵıdat­ta­ry­nyń qoǵamdyq sanada ári qaraı tereń ornyǵýyna jol ashady.

Biz memlekettik basqarý isiniń tıimdiligin baǵalaýda Memleket basshysynyń «Árbir sheshim, árbir joba eń aldymen elge paıdaly bolýy qajet» degen pikirin eskerýimiz qajet. Sebebi halyq úshin eń bastysy – nátıje.

Joldaýda memlekettik organ­­dardyń azamattardyń ótinish­terin qaraýyna qatysty olardy taldaý qajettiligi usy­nyldy. Bul týraly Joldaýda ótinishterdi qaraýǵa qatysty jumystyń biryńǵaı ekojúıesi qalyptasa bas­taǵanynyń mańyz­dylyǵy, munyń halyqtyń qajet­tiligi men talap-tilegin naqty bilip otyrýǵa múmkindik beretini, osy oraıda memlekettik organdar óz jumysyn jetildirý úshin azamattardyń ótinishterin taldaýǵa kóbirek nazar aýdarýǵa tıis ekeni aıtylǵan.

Azamattardyń ótinishterine turaqty taldaý júrgizý – qor­dalanǵan túıtkildi máselelerdi júıe­­lep, olardy retteýge, bol­dyr­maýǵa jáne sol arqyly naq­ty sheshimder qabyldaýǵa jol ashady. Iаǵnı qordalanǵan máse­le­lerdiń saldarymen ǵana kúresip qoımaı, olardyń sebebin anyq­taýǵa múmkindik beredi. Tal­daý júrgizýdiń mańyzy da osyn­da.

Memleket basshysy Joldaýda memlekettik qyzmetshilerdiń biliktiligin arttyrý máselesiniń áli de ózektiligin, úmitkerdi qyz­metke taǵaıyndaǵan kezde onyń kásibı jáne moraldyq qa­sıetterin muqııat eskerý qa­jettigin, onyń burynǵy jumysyn qalaı atqarǵany da qaperde bolýy kerektigin nazarǵa aldy. Agenttik bul baǵytta tu­raqty jumys júrgizedi.

Darhan JAZYQBAI,

Memlekettik qyzmet isteri agenttiginiń tóraǵasy