26 sáýirde Qazaqstan Respýblıkasynyń Venadaǵy elshiliginde kezekten tys prezıdenttik saılaý ótkizý úshin №190 saılaý ýchaskesi ashyldy. Saılaýǵa Avstrııada turǵylyqty turatyn jáne konsýldyq esepke tirkelgen, sondaı-aq, osynda ýaqytsha kelgen Qazaqstan azamattary qatysty.
Elshilik ǵımaratynda azamattardyń erkin daýys berýine barlyq jaǵdaı jasaldy. QR OSK nusqaýlyǵyna sáıkes, kandıdattar týraly aqparattyq stendter, jáshikter men daýys berý kabınalary ornatyldy.
Elshilik qyzmetkerleriniń kúshimen óz konstıtýsııalyq quqyǵyn Vena qalasyna kelip oryndaı almaǵan otandastarǵa tıisti standarttar men erejeler sheńberinde jyljymaly jáshik arqyly Gras qalasynda daýys berý uıymdastyryldy.
Saılaýǵa Avstrııada turǵylyqty jáne ýaqytsha turyp jatqan Qazaqstan azamattary, sonyń ishinde halyqaralyq uıymdardyń qyzmetkerleri, qazaqstandyq dıplomattar men olardyń otbasy músheleri, bıznes jáne stýdenttik qaýymdastyqtyń ókilderi qatysty.
* * *
26 sáýirde Qazaqstan Respýblıkasynyń Arab Mysyr Respýblıkasynda ashylǵan №201 saılaý ýchaskesinde Qazaqstan Respýblıkasynyń prezıdenttik saılaýy ótti.
Qazaqstan azamattary, ásirese, stýdentter mysyrlyq joǵary oqý oryndarynda ótip jatqan emtıhandarǵa qaramastan, saılaý ýchaskelerine kelip, azamattyq boryshtaryn oryndaýǵa asyqty.
Jeksenbi jumys kúni bolǵanymen, saılaýǵa Mysyrda turaqty nemese ýaqytsha turyp jatqan barlyq azamattarymyz qatysty. Saılaý úderisi esh zań buzýshylyqsyz qalypty jaǵdaıda ótti.
Kaır qalasyna kele almaǵan azamattar úshin Aleksandrııa qalasyna kóshpeli komıssııa uıymdastyryldy. Al №201 saılaý ýchaskesiniń jumysy Kaır ýaqytymen saǵat 20:00-de aıaqtaldy, saılaý nátıjeleri Ortalyq saılaý komıssııasyna jiberildi.
* * *
Astanada tań ata bastaǵanda Varshavadaǵy Qazaqstan elshiliginde Qazaqstan Prezıdentin saılaý aıaqtaldy. Polshadaǵy qazaqstandyq azamattar saılaýǵa belsendi qatysty.
Eldiń joǵary oqý oryndarynda bilim alyp jatqan qazaqstandyq jastardyń otanshyldyǵyn atap ótken jón. Qazaqstan elshiligi janynda qurylǵan saılaý ýchaskesine tek Varshavadan ǵana emes, Lodz, Poznan jáne Lıýblın sekildi basqa qalalardan da stýdentter kelip saılaýǵa qatysty. Qazaqstannyń Polshadaǵy elshisi E.О́tembaev elshilikte qazaqstandyq jastarmen kezdesti.
Polshada ótken álem chempıonatynda jeńiske jetip, nátıjesinde 2016 jyly Máskeý men Sankt-Peterbýrgte ótetin joǵary dıvızıon oıyndaryna qatysatyn Qazaqstan hokkeı qurama komandasynyń músheleri de daýys berdi. Elshi E.О́tembaev Qazaqstan hokkeıshilerin jeńisterimen quttyqtady jáne saılaýǵa belsendi qatysqandaryn atap ótip, sportshylarǵa halyqaralyq alańdarda mol tabys tiledi.
* * *
26 sáýirde jergilikti saǵat 07:00-den bastap Qazaqstan Respýblıkasy Prezıdentiniń kezekten tys saılaýyna oraı Ońtústik Amerıka aımaǵynda tarıhta alǵash ret Qazaqstan Respýblıkasynyń Brazılııa Federatıvtik Respýblıkasyndaǵy elshiliginiń ǵımaratynda ornalasqan №247 saılaý ýchaskesi jumys istedi.
Brazılııada jáne basqa da Latyn Amerıkasy memleketterinde turatyn Qazaqstan azamattary Federaldyq aımaq, Brazılıa qalasyna kezekten tys saılaýǵa qatysyp, daýys berýge shaqyryldy, dep habarlady Qazaqstan Respýblıkasy Syrtqy ister mınıstrliginiń baspasóz qyzmeti.