QR Parlamenti Májilisiniń depýtaty Ádil Jubanov bastaǵan halyqtyq shtab músheleri «Atyraý oblysy Sý Arnasy» KMM men «Atyraýneftemash» JShS ujymdarymen kezdesý ótkizdi, dep habarlaıdy Egemen.kz.
Kezdesýde energııa tapshylyǵy, energetıkalyq táýelsizdik máselesi, sondaı-aq 6 qazanda ótetin referendým, AES salýdyń mańyzdylyǵyn talqylady.
«Qazir halqy óte tyǵyz ornalasqan ońtústik óńirde energııa tapshylyǵy aıqyn sezilip júr. Bul jaǵdaı birtindep elimizdiń barlyq aımaǵynda baıqalady. Sondyqtan AES salýdan qoryqpaýymyz kerek. Bizdiń mindetimiz - óskeleń urpaqqa paıdaǵa asatyn dúnıe qaldyrý», dedi Májilis depýtaty.
Oblystyq Halyqtyq shtab múshesi, tehnıka ǵylymdarynyń doktory Beket Kenjeǵulovtyń aıtýynsha, kún men jel energııasyna qaraǵanda AES salýdyń tıimdiligi joǵary.
«Álem boıynsha 17 el Atom energetıkasy jónindegi halyqaralyq agenttikke AES salýǵa nıet bildirgen, onyń ishinde Qazaqstan da bar. Kún men jel energııasy tabıǵatqa táýeldi. Sondyqtan olarǵa qatty senim artýǵa bolmaıdy. Balamaly energııa kózderiniń paıdalaný merzimi – 15 jyl bolsa, AES-tiń jumys isteý merzimi 60-80 jylǵa deıin barady. Qazaqstanda eki reaktorly AES salynsa 2,4 Gb toq kózi paıda bolady. Mamandardyń esebi boıynsha elimizge keminde 4 jańa AES qajet. Sebebi, 2,4 Gb toq kózi eldegi tapshylyqty tolyq qamtymaıdy», dedi shtab múshesi.