Búgin, 27 qyrkúıekte Astanada Qazaqstan Ulttyq Olımpıadalyq komıteti Bas Assambleıasynyń kezekten tys jıyny ótti, dep habarlaıdy Egemen.kz Olympic.kz-ke silteme jasap.
Qazaqstan UOK basqarýshy organynyń otyrysyna Qazaqstan UOK prezıdenti Gennadıı Golovkın, QR sport jáne týrızm vıse-mınıstri Serik Jarasbaev, sondaı-aq olımpıadalyq sport túrleri boıynsha 31 Ulttyq sporttyq federasııalardyń ókilderi qatysqan.
Jıynda Gennadıı Golovkın sportshylardyń Parıj Olımpıadasyndaǵy jetistikterine toqtalyp, jarys sıkliniń áli de jalǵasyp jatqanyn atap ótti. Sondaı-aq 2028 jyly Los-Andjeleste ótetin kelesi jazǵy oıyndarǵa daıyndyqty qazirden bastaý kerektigin tilge tıek etti.
Sonymen qatar Gennadıı Golovkın jańa bas hatshy qyzmetine Álimjan Aqaevtyń kandıdatýrasyn usynyp, usynysty qatysýshylar biraýyzdan bekitken.
«Bas Assambleıa múshelerine maǵan senim artyp, men usynǵan kandıdatty qoldaǵany úshin alǵys aıtamyn. Álimjan Aqaevty jańa qyzmetke saılanýymen quttyqtaımyn. Onyń jyldar boıy jınaǵan tájirıbesi men bilimi alǵa qoıylǵan maqsattarǵa jetýge kómekteserine senemin», dedi Gennadıı Golovkın.