Qazir Qyzylordaǵa syrttan kelgenderdi eń áýeli qalanyń tazalyǵy qaıran qaldyrady. Keń kósheler, tap-tuınaqtaı parkter men skverler, balalarǵa arnalǵan oıyn alańdary bul baǵyttaǵy jumystyń nátıjeli ekenin kórsetip tur. Oblys ortalyǵymen qatar, aýdandar men aýyldar da tazalyqqa mán berip, óńirde aýyldyń ajaryn aıshyqtaıtyn «Úlgili eldi meken» baıqaýy qolǵa alyndy. Memleket basshysy bastamashy bolǵan «Taza Qazaqstan» ekologııalyq aksııasy osy baǵyttaǵy jumysty jalǵastyryp, jurtty qorshaǵan orta jaǵdaıyn jaqsartýǵa jumyldyrýǵa negiz boldy.
Qyzylorda qalalyq sáýlet jáne qala qurylysy bóliminiń basshysy Dinmuhambet Syrlybaev «Taza Qazaqstan» ekologııalyq aksııasy aıasynda oblys ortalyǵynda saıabaqtardy, alleıalar men skverlerdi qaıta jańǵyrtý boıynsha aýqymdy jumys atqarylǵanyn aıtady. Qolaıly klımat pen turǵyndarǵa jaıly, qaýipsiz orta qalyptastyrý maqsatynda jańa demalys aımaqtary men alańdar salynyp jatyr.
Keıingi eki jylda qala kósheleri keńeıip, jaıaý júrginshiler joly salynyp, turǵyndar tynyǵatyn oryndarda sýburqaqtar kóbeıdi. Qalanyń ortalyq alańy kásipkerlerdiń demeýshiligimen abattandyryldy.
Turaqty túrde uıymdastyrylyp kele jatqan tazalyq aksııalary arqasynda B.Shókenov atyndaǵy saıabaq pen Tuńǵysh Prezıdent parki sııaqty qyzylordalyqtar kóp baratyn demalys oryndarynyń jaǵdaıy aıtarlyqtaı jaqsardy. «Taza Qazaqstan» ekologııalyq sharasy bastalǵaly beri oǵan oblystyń 548 299-dan astam turǵyny qatysyp, 21360 tonnadan astam qoqys shyǵaryldy. Bes júzden asatyn alań men saıabaq, 791 áleýmettik, 1130 óndiristik jáne kásipkerlik nysan, 294 sý aıdyny, 47 451 aýla men kóshe tazartyldy. Prezıdent bastamasymen qolǵa alynǵan respýblıkalyq aksııa aıasynda 225 tarıhı eskertkish aınalasy da kúl-qoqystan arylyp qaldy. Aksııa bastalǵaly beri óńirde 129 358 tal kósheti egildi.
Qaladaǵy Muratbaev kóshesindegi №15, 17 kópqabatty úıler turǵyndary ózara kelisip, senbilikke shyqty. PIK jumysshylarymen birlesip, ózgege úlgi bolarlyq is bastaǵan 50 turǵyn aýlany tazalady. «Biz bul bastama arqyly qorshaǵan ortaǵa qamqorlyq ózimizden bastalatynyn kórsetkimiz keldi. Bireýdiń kelip istep bergenin kútpeı, árkim ortaq iske úles qossa, qalamyz da kórkeıe túsedi», deıdi belsendi turǵyndar.
Osy kúni mundaı aksııa Abaı dańǵylyndaǵy qasbeti qaıta jańartylǵan 47 úıdiń aýlasynda jalǵasyn tapty. Bul turǵyn úılerdiń aýlasyn ótken jyly «Qyran» JShS abattandyryp, oıyn alańdaryn salyp bergen bolatyn.
Aımaq ekologııasyn qorǵaý baǵytyndaǵy jobanyń biri Qyzylorda qalasynda jaqynda ǵana iske qosylǵan ekotaksı qyzmeti bolyp otyr. Elektrmen jumys isteıtin kólik qýaty 460 shaqyrymǵa jetedi. Qalada olardy qýattaıtyn 8 qurylǵy bar. Qazir 52 ekotaksı qalalyqtarǵa qyzmet kórsetýge kirisip ketti. Olardyń qataryna kóp keshikpeı taǵy 48 kólik qosylady. «Taza Qazaqstan» ekologııalyq aksııasy aıasyndaǵy joba boıynsha kólikterdi alýǵa 1 mlrd 100 mln teńge jumsalyp otyr.
«Qalamyzda osyndaı taksıdiń paıda bolǵany qýantady. Únemdi, jaıly kólikterdiń tıimdiligine eshkimniń talasy joq. Eń aldymen bul taksıler qala ekologııasyn saqtaýǵa oń áserin tıgizeri sózsiz», deıdi Qyzylorda avtobýs parkiniń dırektory Ábdibákir Mashtaev.
Qalany abattandyryp, tazalaý jumysyn úzdiksiz júrgizetin mekemelerdiń materıaldyq-tehnıkalyq bazasyn jaqsartý da – nazarda turǵan máseleniń biri. Osy maqsatta jýyrda ǵana «Qyzylorda tazalyǵy», «Qyzylorda sý júıesi», «Jasyl Qyzylorda» mekemelerine 52 arnaıy tehnıka tabystaldy. Aımaqtaǵy tyń joba – «Úlgili eldi meken» baıqaýy ótkizilgeli beri jeńimpaz bolyp tanylǵan eldi mekenderge 48 kólik berildi. Osynyń bári ekologııalyq jobanyń júıeli túrde júzege asýyna sep bolyp otyr.
QYZYLORDA