Premer-Mınıstrdiń orynbasary – Ulttyq ekonomıka mınıstri Nurlan Baıbazarov esepti kezeńde ekonomıkanyń ósimi 4% -dy quraǵanyn baıandady. Naqty sektorda oń dınamıka 5%-dy, qyzmet kórsetý salasynda 3,8%-dy quraǵan, dep habarlaıdy Egemen.kz Ekonomıka mınıstrliginiń baspasóz qyzmetine silteme jasap.
Mınıstrlik málimetinshe, salalar arasynda eń joǵary ósýdi aýyl sharýashylyǵy men qurylys salasy kórsetken. Kólik qyzmeti 8,0%-ǵa, baılanys 6,4%-ǵa, saýda 6,3%-ǵa, óńdeý ónerkásibi 4,8%-ǵa óskeni belgili boldy.
«Negizgi kapıtalǵa salynǵan ınvestısııalardyń ósý qarqyny 0,6%-dy qurady. Investısııa kólemi baılanysta 81,7%-ǵa, bilim berýde – 79,3%-ǵa, kólikte – 31,1%-ǵa, óńdeý ónerkásibinde – 6,3%-ǵa, densaýlyq saqtaýda – 4,8%-ǵa ósti», dep habarlady vedomstvonyń baspasóz qyzmeti.
Al, qańtar-tamyz aılarynda elimizdiń syrtqy saýda aınalymy $91,7 mlrd-ty quraǵan. Eksport $53,5 mlrd-ty, onyń ishinde óńdelgen taýarlardyń eksporty $17,8 mlrd-ty, ımport $38,1 mlrd-ty quraǵan. Jalpy alǵanda, QR-nyń oń saýda balansy $15,4 mlrd-qa teń anyqtalǵan.Sonymen qatar óńdeý ónerkásibinde oń ósý qarqyny saqtalǵany atap ótildi. О́ndiris kólemi 4,8%-ǵa, al taý-ken ónerkásibinde 1,2%-ǵa ósken.
«Bıylǵy jylǵy qańtar-qyrkúıek aılarynda 12,4 mln sharshy metr turǵyn úı paıdalanýǵa berildi, bul ótken jyldyń tıisti kezeńiniń kórsetkishinen 6,2%-ǵa artyq.Aýyl sharýashylyǵy ósýdiń belsendi kezeńine ótti. Dándi daqyldardy jınaýdaǵy údemeli qarqynnyń arqasynda sala óndirisiniń kólemi 11,4%-ǵa ulǵaıdy. О́simdik sharýashylyǵynyń ósim 17,8%-dy qurady»,delingen habarlamada.
Ekonomıka mınıstriniń aıtýynsha, ekonomıkalyq ósýdi qamtamasyz etý úshin ortalyq jáne jergilikti atqarýshy organdar mynadaı sharalarǵa basa nazar aýdarýy qajet:
Igerý somalaryn qatań baqylaýǵa alyp, ınvestısııalyq bıýdjetterdi ıgerý; Jyldyń sońyna deıin munaı óndirýdiń josparlanǵan kólemin oryndaý; «Samruq-Qazyna» holdıngi otandyq óndirýshilerdiń taýarlaryn kompanııa tobymen satyp alýyn ulǵaıtý; Astyq jınaýdy tolyq kólemde aıaqtaý, «Qazaqstan Temir Joly» aksıonerlik qoǵamy jáne múddeli memlekettik organdar astyqty, onyń ishinde eksportqa úzdiksiz tasymaldaý men ótkizýdi qamtamasyz etsin.