Oblys ortalyǵyndaǵy №1 qalalyq emhana aldynda aq halatty abzal jandardyń qurmetine arnalǵan dárigerler saıabaǵy ashyldy. Jaıly, jarasymdy demalys baǵy jergilikti turǵyndar men qala meımandaryna belsendi, salamatty ómir saltyn nasıhattaıtyn qalaýly oryn retinde qyzmet etedi.
Saıabaqtyń boı kóterýine qoldaý bildirgen oblys ákimdigi demalys ornynyń medısına qyzmetkerleriniń mamandyǵyna adaldyǵy men adam densaýlyǵyn saqtaýda atqaryp otyrǵan ólsheýsiz eńbegine alǵys pen rızashylyqtyń bir ısharasy ekenin aıtady. Jańa saıabaqtyń jalpy aýdany 6 myń sharshy metrdi quraıdy. Aýmaqty kógaldandyrýǵa erekshe nazar aýdarylyp, qaıyń, sibir shyrshasy, tal, bóriqaraqat, shyrsha, arsha, pıramıda terekteri, vıbýrným, taý kúli sııaqty butalardyń kóshetteri otyrǵyzyldy. Sonymen qatar sport alańdary men balalardyń oıyn attraksıondary da qarastyrylǵan. Saıabaq jaryqtandyrylyp, oryndyqtar, qoqys jáshikteri ornatyldy.
«Qalamyz oblys mártebesine ıe bolǵaly kóz aldymyzda ózgerip, jasaryp keledi. Bul bizdi qýantady. Osy isterdiń basy-qasynda júrgen azamattardyń barlyǵyna alǵystan basqa aıtarymyz joq. Densaýlyqty saqtaýdyń qanshalyqty mańyzdy ekenin ásirese biz, dárigerler jaqsy bilemiz. Al myna saıabaq – basty baılyǵymyzdy qalypty ustap turýǵa taptyrmas oryn. Taǵy bir atap óterligi – bul saıabaqtyń salynýy bizge degen qurmettiń bir belgisi dep bilemin», dedi ardager dáriger, medısına ǵylymdarynyń doktory, professor Raıfa Ivanova.
Bıyl oblys ákimdiginiń bastamasymen Semeı qalasyn abattandyrý jumystary aıasynda 62 aýla men 4 qoǵamdyq keńistik jańǵyrtyldy. Al qalanyń sol jaǵalaýynan oryn alǵan Muhtar Áýezov eskertkishiniń mańy men úlken aýmaqty qamtyǵan alańdy jóndeý jumysy josparǵa saı júzege asyp jatyr.
Abaı oblysy