Qyzylordada qarańǵyny jamylyp qylmysqa baratyndar qatary jyl sanap azaıyp keledi. Bul – kóshelerde ornalasqan baqylaý kameralarynyń septigi. Oblystyq polısııa departamenti baspasóz qyzmetiniń dereginshe, jyl basynan beınekameralar kómegimen 122 qylmys ashylypty.
Osy kóktemde oblys ákimi Nurlybek Nálibaevtyń qaladaǵy nysandardy aralaý kezinde oblys ákimi apparatynyń sıfrlyq tehnologııalar bóliminiń basshysy Sábıt Ibadýlla oblys ortalyǵyndaǵy beınebaqylaý kameralarynyń jumysy men «Qaýipsiz qala» jobasynyń jaı-japsaryn aıtqan edi. 2029 jylǵa deıin júzege asýǵa tıis «Qaýipsiz qala» jobasynda halyq kóp ornalasqan jerlerde 1 400 kamera, 19 ıntellektýaldy qıylys pen 58 jyldamdyq ólshegish, sondaı-aq 20 Sergek Qorgau ornatylatyny qarastyrylǵan. Bul mobıldi qosymsha jol-patrýldik polısııa qyzmetkerine planshet arqyly kólik jáne júrgizýshiniń barlyq deregine qol jetkizýge múmkindik beredi.
Al jazda oblysta óńirdegi sıfrlandyrý jáne aqparattyq-kommýnıkasııalyq tehnologııalardy damytý máselelerine arnalǵan jıyn ótip, onda qala aýmaǵyndaǵy beınebaqylaý kameralary men avtokólik jyldamdyǵyn ólsheıtin quraldar máselesi sóz bolǵan edi. Kún tártibinde turǵan máselege oraı jedel basqarý ortalyqtary jańǵyrtylyp, 7 aýdan ortalyǵyna da beınebaqylaý kameralaryn ornatý josparlanyp otyr. Jalpy Qyzylorda «Aqyldy qala» baǵdarlamasynyń negizgi komponentteriniń basym kópshiligi oryndalǵan óńir retinde baǵalanady.
Beınekameralar polısııa jumysynyń tıimdiligin arttyryp, qylmystyń jedel ashylýyna kóp kómektesedi. Jyl basynan beri beınebaqylaý kameralary 41 myńnan asa ákimshilik quqyq buzýshylyqty anyqtasa, onyń ishinde 34 myńnan astamy jol qozǵalysy erejelerin buzý derekteri bolyp otyr. Osy ýaqyt aralyǵynda «Múldem tózbeýshilik» qaǵıdasyn qalyptastyrý maqsatynda beınebaqylaýshy ınspektorlar 3 myńnan asa usaq buzaqylyq, 2 myńnan asa qoǵamdyq oryndarǵa masań kúıde kelý, 300 qoǵamdyq oryndarda tıisý, 2 026 basqa da quqyqbuzýshylyq deregin anyqtaǵan. Sondaı-aq adam kóp shoǵyrlanatyn oryndarǵa ornatylǵan «SOS» dabyl batyrmasy arqyly 15 habarlama túsipti.
Beınekameralar kómegin kórsetetin bir-eki mysal aıta keteıik. Bıylǵy 30 qańtarda Qyzylorda qalasynyń aýmaǵyndaǵy dúkenderdiń birinde bolǵan telefon urlyǵy osy qurylǵy kómegimen uzaqqa barmaı ashyldy. Urlyq jóninde shahar turǵyny qalalyq polısııa basqarmasyna aryzdanyp, sonyń negizinde uıymdastyrylǵan jedel-izdestirý sharalary kezinde kamera kómegimen kúdikke ilingen 52 jastaǵy azamatsha ustaldy. Urlanǵan telefon óz ıesine qaıtarylyp, oblys turǵyny polısııa qyzmetkerlerine alǵys bildirdi.
Al qyrkúıektiń 19-y kúni SOS batyrmasyna qala turǵynynan habarlama túsipti. Belgisiz bireýler uıaly telefonyn tartyp alǵanyn aıtqan turǵyn aryzyna sáıkes dereý polısııa narıadtaryna baǵyt-baǵdar beriledi. Jedel áreket etken polıseıler kópke uzatpaı eki kúdiktini quryqtady. Jalpy polıseıler SOS túımesinen táýlik boıy jedel basqarý ortalyǵyna túsetin qońyraýlar kezekshi bólim qyzmetkerine jaǵdaıdy óz betinshe baǵalaýǵa múmkindik beretinin aıtady.
Qyzylordada kamera ornatý 2017 jyldan bastap qolǵa alyndy. Júıeni paıdalaný, tehnıkalyq qyzmet kórsetý jumysyn «Kórkem Telekom» JShS atqarady. Búginde Jedel basqarý ortalyǵyna qarasty 272 beınebaqylaý kamerasy jumys istese, odan bólek 20 «Arkan» stasıonarlyq jyldamdyq ólshegishi, 5 ıntellektýaldy qıylys ornatylǵan.
Kópshilik arasynda «beınebaqylaý kamerasyn kóbeıtý aıyppul salyp, qarjy jınaýdyń amaly» degen de pikirdi de estip qalamyz. Biraq jurttyń kóshe kameralarynyń qoǵamdyq qaýipsizdikti qamtamasyz etip, tártipti saqtaý baǵytyndaǵy jumystardy jedel uıymdastyrýǵa kómegi kóp bolyp otyrǵanyna kózi jetti.
Qyzylorda