Respýblıka kúnine oraı Nıý-Iorkte Qazaqstannyń Memlekettik týy kókte jelbiredi. Saltanatty is-shara Nıý-Iorktiń tanymal Ýoll-Strıt kóshesinde ótken.
Tý kóterý rásimine oraı alańǵa Nıý-Iork merııasy, qazaq dıasporasy, dıplomattar, stýdentter, Qazaqstannyń Birikken Ulttar Uıymy janyndaǵy Turaqty ókildigi men Bas konsýldyǵy ókilderi kelgen. Sondaı-aq Dımashtyń jankúıerleri de osy jerge jınalǵan.
– Bul mańyzdy is-sharaǵa bas konsýldyń ózi New York Film Academy-da oqyp jatqandardyń barlyǵyn shaqyrdy. Birimiz de qalmaı bardyq. Megapolıstiń meri Erık Adams bastaǵan bir top zııaly qaýym ókili jınalypty. Onsyz da týrıst aǵylǵan Bowling Green alańynda ıne shanshar jer bolǵan joq. Aldymen quttyqtaýlar aıtyldy. Odan soń Abaıdyń «Kózimniń qarasy» ánin, Qurmanǵazynyń «Adaı» kúıin tyńdap, tegin taratylǵan kók shokoladtan aýyz tıdik. Aınalamyzda – qazaqtyń shapany men kamzolyn kıgen jigitter men qyzdar. Kóziń qýanady eken. Al kók baıraqty aspanǵa kóterip ánuran oınaǵanda elde júrgendeı bir marqaıyp ári tolqyp, erekshe jasap qaldyq, – dep «Bolashaq» baǵdarlamasymen AQSh-ta bilim alyp jatqan otandasymyz Ǵanı Jápishev óz áserimen bólisti.
Onyń aıtýynsha, qala meri Erık Adams jınalǵandardy Respýblıka kúnimen quttyqtap, eki el arasyndaǵy yntymaqtastyqty atap ótken.
– Dál qazir kók týymyz Manhettan kóginde jelbirep tur. Ádemi kórinis. Bizdi umytpaı arnaıy shaqyrǵan Nıý-Iorktegi elimizdiń Bas konsýly Raýan Tileýlın myrzaǵa kóp rahmet! Elimizdiń maqtanyshy Dımash Qudaıbergenniń jankúıerleri de kóptep keldi. Men de Dımashtyń týǵan óńiri Aqtóbedenmin dep edim, bas salyp sýretke tústi, – deıdi otandasymyz.