Respýblıka kúni qarsańynda Memleket basshysynyń tapsyrmasymen mádenıet salasynyń qyzmetkerlerine páter sertıfıkattary tabystaldy.
Saltanatty tabystaý rásimine qatysqan Mádenıet jáne aqparat mınıstri Aıda Balaeva memleket azamattardy turǵyn úımen qamtamasyz etý máselesine erekshe kóńil bóletinin atap ótti.
«Prezıdenttiń basshylyǵymen tek turǵyn úı salasy ǵana emes, áleýmettik saıasattyń basqa da baǵyttary qarqyndy damyp keledi. Adal eńbek etken azamat memleket pen qoǵamnyń qoldaýyn árqashan sezinetindeı jaǵdaı jasalyp jatyr. Máselen, 2021 jyldan bastap azamattar zeınetaqy jınaqtaryn paıdalanyp, turǵyn úı satyp alýǵa múmkindik aldy. Osy ýaqyt ishinde 2 mıllıonǵa jýyq azamat bul múmkindikti paıdalandy. Satyp alý quqyǵymen jalǵa beriletin turǵyn úı kólemi aıtarlyqtaı artty. Úkimet mundaı turǵyn úı kólemin tórt ese arttyrýdy josparlap otyr. Byltyr el Prezıdentiniń atynan buqaralyq aqparat quraldarynyń qyzmetkerlerine 65 páterdiń kilti tabystalǵan edi. Bıyl bul bastama jalǵasyn taýyp, 67 jańa páter berildi. Búgingi mádenıet salasy qyzmetkerlerine páter sertıfıkattaryn tapsyrý – Memleket basshysy saıasatynyń zańdy jalǵasy. Mádenıet salasy – qoǵam damýynyń mańyzdy elementi, sondyqtan bul memlekettiń nazarynda bolady. Sizderge jańa úıde bereke-birlik, densaýlyq jáne baqyt tileımin», dedi mınıstr.
Negizinen páter ıegerleri – erekshe qajettilikteri bar qyzmetkerler, múmkindigi shekteýli balalardy tárbıelep otyrǵan otbasylar, kóp balaly otbasylar, sondaı-aq jalǵyzbasty analar.
Jańa páterge ıe bolǵan jandardyń biri – Samal Ájmuratova. Ol – 5 balany tárbıelep otyrǵan kóp balaly ana. Qazaq ulttyq óner ýnıversıtetinde 16 jyldan beri pedagog bolyp jumys isteıdi.
«Búgin – meniń otbasym úshin jańa bir kezeńniń bastaýy, óıtkeni bizdiń óz úıimiz bolǵan joq. Páter alýǵa kómekteskenderge shyn júrekten alǵysymdy bildiremin. Mundaı bastama – óz eliniń ıgiligi úshin eńbek etip júrgen qyzmetkerlerge úlken qoldaý», dedi S.Ájmuratova.