Bıylǵy toǵyz aıda túrli órtten Soltústik Qazaqstan oblysynda 23 adam qaıtys boldy, 5 adam gazǵa tunshyǵyp qaza tapty. 28 taǵdyrdyń syrtynda bala-shaǵasy, ata-anasy turǵanyn eskersek, bul oqıǵalar júzdegen adamǵa qaıǵy qushtyryp ketti. Mıllıondaǵan teńgeniń materıaldyq shyǵyndaryn ákeldi. Onyń ústine 35 adam órtten qatty jaraqat aldy.
О́rtten opat bolǵandardyń úsheýi bala. Sonyń ishinde Esil aýdanyndaǵy Ilınka aýylynda órtenip ketken eki balanyń qaıǵysy jaqyndaryna aýyr tıdi. Úıde jalǵyz qalǵan toǵyz jáne úsh jastaǵy bala janyp jatqan peshtiń aýzy ashylyp ketken shaladan tutanǵan órtten tunshyǵyp ólgen. Kúndizgi saǵat 10-da bastalǵan órt eki saǵattyń ishinde sóndirilgenimen, balalardyń ómirin qıyp ketti.
Tilsiz jaýǵa quryq beretin sebeptiń biri – alkogoldik ishimdik. О́rtten qaza bolǵandardyń altaýy – alkogoldik ishimdiktiń kesirinen mas kúıinde uıyqtap qalǵandar. Soltústik Qazaqstan oblystyq TJ departamenti bastyǵynyń orynbasary Dmıtrıı Rastıhın: «О́rttiń negizgi bóligi jekemenshik sektorlardyń úılerinen shyǵady. Toǵyz aıdaǵy barlyq órttiń 74 paıyzy, ıaǵnı 226-sy solardyń úlesinde. 47 órt avtojoldardaǵy apattardyń kesirinen boldy», deıdi. О́rttiń taǵy bir sebebi – elektr jabdyqtarynyń durys ornatylmaýy. Sondaı-aq durys paıdalanylyp, ýaqtyly jóndeý jasalmasa, ot jaǵylatyn peshterdiń de qaýpi zor.
Qazir ot jaǵý maýsymy bastaldy. Jýyrda ǵana Petropavldyń Zaısev kóshesindegi qatar salynǵan 84 sharshy metrlik eki úı janyp, páterde turatyn úsh adam órtenip ketti. Bireýi 2021 jyly týǵan bóbek. TJ sarapshylary órt turǵyndardyń ishimdik iship, uıyqtap qalǵandyǵynan shyqqan degen qorytyndyǵa keldi. Mundaǵy órtte bir adamdy TJ qyzmetkerleri qutqarǵan. Qazir úı ıesi J.Lysenkonyń ústinen peshti durys salmaı, pátershilerge jalǵa bergenine qatysty qylmystyq is qozǵalǵan.
Taǵy bir órt «Raketa» saıajaı birlestiginen shyqty. Saıajaıdyń ıesi, 1953 jyly týǵan adam órtte qalyp, janyp ketti. Úı ıesi mas kúıinde, qolyndaǵy sóndirilmegen temekisimen uıyqtap qalǵan.
О́rt sóndirýshiler qar ketip, dala qurǵaǵan sáýir aıynyń basynan bastalǵan jeti aıdy «órt qaýpi mol kezeń» dep ataıdy. О́ıtkeni jaýyn az bolsa, qurǵaǵan shóp pen byltyrǵy qaý otqa tez tutanady. Laqtyryp jibergen temeki tuqylynan da órt ketýi múmkin. Bıyl da osyndaı 63 órt shyǵyp, 7,1 gektar jerdi kúıdirgen. Degenmen mundaı órttiń sany byltyrǵydan eki ese az. Sondaı-aq úıilip turǵan sharýalardyń shóbi men sabanynan da órt shyǵady. Bıyl osyndaı 18 órt bolypty, biraq byltyrǵymen salystyrǵanda bul da azyraq. О́rt sóndirýshiler dalaly jerlerge jıi shyǵyp, baqylaýdy júıeli júrgizip turady. Reıdterdiń barysynda 148 adamǵa ákimshilik jaza belgilengen. Al BAQ arqyly órt qaýipsizdigin saqtaý týraly 1197 ret jarııalanym jasalǵan.
Soltústik Qazaqstan oblysy