Mádenıet jáne aqparat mınıstrliginiń qoldaýymen «Astana Operada» álemge áıgili skrıpkashy ári dırıjer, Qazaqstannyń izgilik elshisi, Qazaqstannyń eńbek sińirgen qaıratkeri Marat Bısenǵalıevtiń sımfonııalyq konserti ótti.
Mýzykalyq keshte «Dala», «Air», «Bı», «Abaı», «Jelsiz túnde jaryq aı», «Aıttym sálem, Qalamqas», «Qarlyǵash», «Dýdaraı» sekildi tanymal kompozısııalar qamtyldy. Sondaı-aq mádenı is-sharaǵa Arýhat Mýsaıpov, mýltıaspapshylar Serik Nurmoldaev, Anar Qasymova, Abzal Aryqbaev, Asqar Soltaǵazın, Qazaqstannyń eńbek sińirgen qaıratkeri Beıimbet Demeýov, jas vokalıst Anna Iýdenıch qatysty.
Konserttiń ereksheligi onyń aıryqsha akýstıkalyq sheshiminde boldy. Marat Bısenǵalıev avtorlyq jumysy retinde kvadrodybystaý áserin kórsetti. Iаǵnı bul – orkestr men hordyń jekelegen toptarynyń sahnada ǵana emes, zaldyń arnaıy akýstıkalyq aımaqtarynda ornalasýy. Bulaı óner kórsetý golografııalyq dybys jasap, emosııalyq sıpatta tyńdarmandarǵa erekshe áser etti.