Soltústik Qazaqstan oblysynyń sanıtarlyq-epıdemıologııalyq baqylaý departamentiniń basshysy Áset Jumataevtyń aıtýyna qaraǵanda, búginde oblysta JRVI (jiti respıratorlyq vırýstyq ınfeksııa) boıynsha syrqattanýdyń epıdemıologııalyq jaǵdaıy nasharlap, aýa raıynyń kúrt sýýyna baılanysty aýrý órshı túsken.
Epıdemıologııalyq qyzmet oblysta JRVI-diń 14 920 jaǵdaıy tirkelgenin jarııalap, bir jaqsysy, onyń ótken jyldyń sáıkes kezeńimen salystyrǵanda 14%-ǵa tómendegenin aıtady. Bıyl naýqastardyń eń kóp bóligi 14 jasqa deıingi balalar arasynda baıqalǵan. Sanyn aıtar bolsaq – 9 847 nemese barlyq syrqattanýshynyń 66%-y. Bul kóbinese jasóspirimderdiń aýa raıynyń yzǵaryn sezbeı, denesiniń býsanǵan kúıinde dalaǵa jıi shyǵyp ketetininiń kesirinen eken.
Sońǵy aptada JRVI-diń 2 773 jaǵdaıy tirkelip, aldyńǵy aptamen salystyrǵanda 1,5 esege ósken. Bir qyzyǵy, jańa epıdemııalyq maýsym kezeńinde tumaý jaǵdaılary tirkelgen joq. Alaıda JRVI-men aýyratyn naýqastardan PTR ádisimen basqa, tumaýǵa jatpaıtyn vırýstardyń bary anyqtalǵan. Olardyń arasynda paragrıptiń 8 jaǵdaıy, rınovırýstyń 12 jaǵdaıy, adenovırýstyń 7 jaǵdaıy, metapnevmovırýstyń 2 jaǵdaıy, bokavırýstyń 3 jaǵdaıy bar. Tumaý men JRVI-men syrqattanýshylyǵynyń etıologııalyq oqylýyn Ulttyq saraptama ortalyǵy oblystyq fılıalynyń vırýsologııalyq zerthanasy anyqtaıdy.
Tumaý joǵary temperatýranyń kenetten paıda bolýymen, jótelmen (ádette qurǵaq), bas aýrýymen, bulshyq et pen býynnyń shanshýymen, eshteńege zaýqy bolmaıtyn álsizdikpen, tamaq aýrýymen, murynnyń sýlanýymen sıpattalady. Qazirgi ýaqytta tumaýdyń aldyn alýdyń tıimdi ádisteriniń biri – vaksınasııa. Tumaýǵa qarsy vaksınasııa negizgi aýrýdyń asqynǵan aǵymynan, aýrýhanaǵa jatqyzýdan, tosyn jaǵdaıdan qorǵaıdy.
1 qazannan 31 qazanǵa deıin oblysta tumaýǵa qarsy ımmýndaý naýqany ótkizilgen. Táýekel tobyna jatatyn adamdarǵa arnalyp reseılik «Grıppol plıýs» vaksınasynyń 60 myń dozasy satyp alyndy.
«Búginde táýekel tobyna jatatyn adamdar 100% (60 000 adam) egildi. Sonyń ishinde: 8 502 medısına qyzmetkeri, 495 júkti áıel, 5 262 oqýshy, medısınalyq uıymdarda dıspanserlik esepte turǵan 20 985 adam, jabyq úlgidegi mekemelerden 1 671 adam (balalar úıleri, sábıler úıleri, qarttar úıleriniń kontıngenti), epıdemıologııalyq kórsetkishter boıynsha 23 085 adam: 6 aıdan 2 jasqa deıingi balalar, 60 jastan asqan adamdar. Tumaýǵa qarsy vaksınamen qamtý ujymdyq ımmýnıtetti qalyptastyrady, epıdemııanyń jaıylýyna jol bermeıdi», dedi Á.Jumataev.
Sonymen birge maman tumaýǵa qarsy vaksınasııadan basqa, arnaýly emes profılaktıkany nazardan tys qaldyrmaý kerektigin de aıtty. Onyń aıtýynsha, aýyryp qalmas úshin betperde kııý, áleýmettik qashyqtyqty saqtaý, múmkindiginshe adam kóp jınalatyn jerlerge barmaý, jeke gıgıena erejelerin saqtaý qajettigin únemi eskerý kerek. Bulardan basqa qoldy sabynmen múmkindiginshe jıi jýýdyń da paıdasy kóp.
JRVI men tumaýǵa qarsy ımmýnıtetti barlyq qoljetimdi tásilmen de kóterýge bolady. Dene shynyqtyrý, jumys, demalys rejimin saqtaý, tolyqqandy uıqy, mıkroelementter men dárýmenderdiń, ásirese «S» vıtamıniniń, sarymsaq pen pııazdyń jetkilikti mólsheri bar taǵamdardy qoldaný kerek. «Al aýyryp qalǵan jaǵdaıda dalaǵa shyqpaı, qonaqqa barmaı, úıde bolý, dáriger shaqyryp, ınfeksııanyń odan ári taralýyn boldyrmas úshin baldyrǵandardy balabaqshaǵa, oqýshylardy mektepke de jibermeý kerek», dedi maman.
PETROPAVL