Úkimet basshysy Oljas Bektenov Qyzylorda oblysyna jasaǵan sapary barysynda Prezıdenttiń jumyspen qamtý jáne áleýmettik ınfraqurylymdy damytý jónindegi tapsyrmalarynyń oryndalý barysyn tekserdi. Sonymen qatar Joldaýda aıtylǵan «Aýyl amanaty» baǵdarlamasy sheńberinde aýyl turǵyndarynyń ál-aýqaty men turmys sapasyn jaqsartý, agroónerkásip keshenin damytý arqyly ekonomıkany ártaraptandyrý, sondaı-aq turǵyndarǵa sapaly bilim berý qyzmetterin usyný úshin áleýmettik ınfraqurylym nysandaryn jańǵyrtý jónindegi tapsyrmalarynyń oryndalý barysyn tekserdi.
Syrdarııa aýdany Besaryq aýylynda Premer-mınıstr «Aýyl amanaty» baǵdarlamasyn iske asyrýdyń jáne bıznestiń áleýmettik jaýapkershiliginiń tabysty mysaldarymen tanysty. «Abaı Dáýlet» JShS qurǵan óndiristik alańda 318,2 mln teńgege aýyl turǵyndarynyń 13 bıznes-bastamasy iske asyrylyp jatyr. Jartylaı fabrıkat, plastıkalyq ydys, aǵashtan jasalǵan buıymdar, toqyma, kondıterlik ónimder, sabyn jáne basqa da ónimder óndiretin sehtar ashyldy. O.Bektenov aýyl turǵyndary shyǵaratyn ónimder jelisimen tanysty.
Oń tájirıbeni keńinen taratý úshin oblystyń ár aýdanynda kemi 3-4 aýylda osyndaı bıznes-ınkýbatorlar ashý jumystary qolǵa alynǵan. Qyzylorda oblysynda «Aýyl amanaty» baǵdarlamasy aıasynda bıyl óńdeý ónerkásibin, mal sharýashylyǵy, ósimdik sharýashylyǵy jáne basqa da keleshegi bar salalarda 610 jumys ornyn ashqan 575 joba iske asyryldy. «Kaz Fries» zaýytynda Premer-mınıstrge agroónerkásip kesheni ónimderin tereń óńdeý salasyndaǵy áleýetti ashý sharalary tanystyryldy. Kásiporynnyń qýaty saǵatyna 150 kıloǵa deıin qýyrylǵan kartop taıaqshalaryn óndirýge jetedi. Daıyn ónim muzdatylyp, ishki naryqta satylady. «Abaı-Dáýlet» JShS dırektory Murat Sársenbaev ósimdik, qus, mal sharýashylyǵymen jáne qurylys ónimderin shyǵarýmen aınalysatyn kópsalaly kompanııanyń óndiristik qýatyn odan ári keńeıtý josparlary týraly habardar etti.
Seriktestik aýyldyń damýyna úlken úles qosyp kele jatqanyn atap ótken jón. 2018 jyldan beri kompanııa bul maqsattarǵa 1,5 mlrd teńgeden asa qarjy bóldi. Qarajat 360 oryndyq mektep, 120 oryndyq balabaqsha jáne dárigerlik ambýlatorııa sııaqty áleýmettik nysandardy abattandyrýǵa, kógaldandyrýǵa, jóndeýge baǵyttalǵan. Demeýshilik qoldaý esebinen osy jyly 150 adamǵa arnalǵan Mádenıet úıi kúrdeli jóndeýden ótti. Munda Prezıdent bastamasymen jastardy otanshyldyq, adamgershilik rýhynda tárbıeleýge baǵyttalǵan «Adal adam» tujyrymdamasy iske asyrylyp jatyr. Balalar úıirmeleri ashylyp, mýzykalyq shyǵarmashylyq ujym quryldy. Sonymen qatar «Adal adam» mádenı ortalyǵynda ornatylǵan podkast-stýdııada tikeleı efırde aýyl bıznesin damytýdyń ózekti máseleleri talqylanady, kórermenderge jergilikti sehtarda óndirilgen ónimder tanystyrylady.
Premer-mınıstr bıznestiń aýyldyq jerlerdegi turmys sapasyn jaqsartýǵa qosqan úlesi mańyzdy ekenin atap ótti.
«Aýyldy damytý, nátıjeli jumyspen qamtýdy yntalandyrý, sapaly áleýmettik ınfraqurylym qurý – Úkimettiń basym mindetteriniń biri. Osy baǵytta biz kásipkerlerdiń barlyq bastamasyn qoldaımyz», dedi Úkimet basshysy.
Qyzylordada Premer-mınıstr búginde 200 jumys orny ashylǵan «Jan Araı» JShS agroónerkásip kesheniniń óndiristik oryndaryn aralady. Kásiporyn kúrish, qurama jem óndirýmen, jemis pen kókónis óńdeý jáne saqtaýmen aınalysady. Munda qýaty táýligine 80 tonna qurama jem óndirýge jetetin jáne táýligine 150 tonna kúrish óńdeı alatyn eki zaýyt jumys isteıdi. Sonymen qatar syıymdylyǵy 4 myń tonna bolatyn kókónis qoımasy bar, bul maýsymaralyq kezeńde áleýmettik mańyzy bar ónimderge baǵa turaqtylyǵyn qamtamasyz etýge múmkindik beredi. Keshen ónimderi elimizde satylady jáne Túrkııa, Irak, Reseı, О́zbekstan, Tájikstan, Ázerbaıjan, Belarýs jáne basqa da alys-jaqyn shetelderge eksporttalady.
O.Bektenov oblys ortalyǵynda balalardy qosymsha bilimmen qamtýdy arttyrý baǵytynda atqarylyp jatqan sharalarmen tanysty. Jeke ınvestısııa esebinen salynǵan jańa Oqýshylar saraıy bıyl qazan aıynda paıdalanýǵa berildi. Jobanyń quny – 2,4 mlrd teńge. 350 adamǵa deıin syıatyn áleýmettik nysan ártúrli jastaǵy oqýshylardyń jan-jaqty damýyna yqpal etetin, gıdroponıka, robottehnıka, ónerkásiptik dızaın, telestýdııa syndy basqa da jańa jabdyqtarmen qamtamasyz etilgen. Munda Premer-mınıstrge kásiptik-tehnıkalyq bilim berý jáne kadrlar daıarlaý júıesin transformasııalaý boıynsha atqarylyp jatqan sharalar týraly aqparat berildi. О́ńirde 28 kolledj jumys isteıdi, onda búginde 20 myńnan astam stýdent bilim alyp jatyr, onyń 5 myńǵa jýyǵy jumysshy mamandyqtary boıynsha oqıdy.
2024–2025 oqý jylynda oblystyń barlyq aýdanynda 7 oqý-óndiristik kombınaty ashyldy. Qysqamerzimdi kásiptik oqytý kýrstary 300-ge jýyq adamdy qamtydy. Alǵashqy kombınat 2022 jyly qalalyq mektep-lıseı bazasynda ashylǵan. Aspaz, tiginshi, grafıkalyq dızaıner jáne basqa da suranysqa ıe mamandyqtar boıynsha 164 maman bitirdi. Aldaǵy ýaqytta tájirıbeni keńeıtý josparlanyp otyr.