«Chıkı-chıkı»

dep sóıleıtin shıki sheneýniktiń máselesi sheshildi Budan biraz buryn áleýmettik jelilerde «chıkı-chıkı» sózimen elge ta­nyl­ǵan shalqarlyq sheneýnikke tártip­tik keńestiń aldynda jaýap berýge týra keldi. Internet «juldyzyna» aınal­ǵan Shalqar aýdandyq turǵyn úı-kom­mýnaldyq sharýashylyǵy, jolaýshylar kóligi jáne avtomobıl joldary bó­li­miniń basshysy Aıan Qorqytulynyń aty atalýy muń eken jınalǵandar tú­gil, tártiptik keńes músheleriniń óz­deri ezý tartty. Soǵan qaramastan, keńes músheleri aýdannyń kommýnaldyq sharýa­shy­lyǵyna jaýapty bildeı basshyny  basynan sıpaı qoımady. Bir aýyzdan «memlekettik qyzmetkerdiń Ar-namys kodeksin buzdy» dep tanydy. – Mamyr aıynda BAQ-ta «Shalqar­lyq sheneýnik áleýmettik jelide kúlkige aınaldy» degen atpen birneshe maqala jaryq kórdi. Youtube jelisinde beınerolık jarııalandy. Aıan Qorqytuly Shalqardaǵy joldardyń jaıyna sha­ǵym­danǵan turǵyndardyń sózine jaý­ap alýǵa barǵan jýrnalıske dóreki jaýap qaıtarǵan. Iаǵnı, memlekettik qyzmetkerdiń Ar-namys kodeksin buzǵan. Al, kodekste «kópshilik aldynda sóz sóılegen kezde memlekettik qyzmetker mádenıetti bolýy tıis» dep kórsetilgen, – deıdi tártiptik keńestiń bas mamany Baǵdat Kenjeǵalıev. «Sasqan úırek artymen júzedi» degendeı, minbege shyqqan Aıan Qorqytuly Shalqardaǵy joldardyń jóndelý jaıyn aıta jónelgende tár­tip­tik keńes músheleri «oblysty uıatqa qal­dyr­ǵanyn» aıtyp, orta joldan toqta­typ, jýrnalıske dóreki sóıleýiniń sebebin surady. Jan berý ońaı ma, Aıan Qorqytuly kameranyń qosýly turǵanyn ańǵar­maǵanyn aıtyp aqtaldy. Biraq,«chıkı-chıkı» sózimen ınternet «juldyzyna» aınalǵan sheneýniktiń sózi eshkimdi sendirmedi. Tártiptik keńes Aıan Qor­qyt­ulyn qyzmetine tolyqtaı sáıkes emes dep sheshti. Internettegi ol «qyzyqty» biz de kórip, óz kózimizge sener-senbesimizdi bilmegenbiz. Ol arada jalǵyz «chıkı-chıkı» sózi ǵana emes, sheneýniktiń basqa da teris qylyqtary kúlkimizdi keltirgen. Tipti, astamsyp sóıleýinen «mynaý qaı­tedi» dep ish jıyp qalǵanbyz. Munyń ózi bizdi áli de balalyǵy qalmaǵan adam bıik mansapqa qalaı jetken, sondaı-aq, artynda jebeýshisi bar-aý degen oıǵa qaldyrǵanyn jasyrýdyń reti joq. Mine, bizdiń halyqqa qyzmet etedi degen sheneýnikterimizdiń túri osyndaı bol­sa, túńilmeske shara qaısy? Muny shene­ý­niktiń shıkiligi deısiz be, álde astamsýdyń aqyry deısiz be, ózińiz bilińiz. Satybaldy SÁÝIRBAI, «Egemen Qazaqstan». Aqtóbe oblysy.