«Aıbyn» polki sarbazdarmen tolyqty

Áskerı ómirdegi erekshe este qalatyn jaýyngerlik rásimderdiń biri ári mańyzdysy – áskerı ant qabyldaý saltanaty. Bul kún – eldiń amandyǵy men memlekettiń qaýipsizdigi senip tapsyrylǵan, halyq pen Prezıdent zor senim artqan sarbaz úshin ózine ómirlik jaýapkershilik júkteıtin qasıetti sát. Sondyqtan bul rásim kúndelikti ótip jatqan is-sharalardyń qatarynan emes. «Eger men ózim qabyldaǵan áskerı antty buzsam, onda Qazaqstan Repýblıkasynyń zandarynda belgilengen qatań jazany ótýge ázirmin», dep aıaqtalatyn áskerı ant­tyń mátininde qanshama jaýap­ker­shi­lik, Otanǵa degen adaldyǵyń men er azamat retindegi jaýyngerlik pary­zyń synalatyn sátterde synyp ketpeýge jigerlendiretin rýh jatyr.

Elimizdiń ár óńirinen saıdyń tasyndaı iriktelip ja­saq­­talǵan «Aıbyn» prezıdent­tik polki áskerı qyzmetshileriniń ant berý saltanatty rásimi Astana qala­syndaǵy «Otan qorǵaýshylar» moný­menti aldyndaǵy alańda ótti. Baryn­sha áskerı sán-saltanatpen ótken jıyn­ǵa kelgen jas sarbaz­dardyń ata-analary men týǵan-týys­tarynyń da qarasy qalyń boldy.

Memlekettik kúzet qyzmeti Aıryqsha maqsattaǵy kúshteriniń, ıaǵnı «Aıbyn» pre­zıdenttik polki qataryna shyqyrtylǵan 200-den asa sarbaz bıyl kúzgi shaqyrylym boıynsha merzimdi áskerı qyzmet sarbazdary elimizdiń barlyq aımaǵy men respýblı­ka­­lyq mańyzy bar qalalarynan iriktelip alyn­ǵan. Olar áskerı bólimderdiń dalalyq oqý ortalyqtarynda daıarlyq kýrsynan ótken.

Saltanatty rásimde Memlekettik kúzet qyzmeti bastyǵynyń orynbasary – Aıryq­sha maqsattaǵy kúshterdiń qolbasshysy, general-maıor Aıtqurman Omarbekov sar­bazdardyń naǵyz áskerı ómirge basqan qa­damyna qut-bereke tiledi.

– Búgin bárimiz úshin mańyzdy oqıǵa sarbazdardyń áskerı ant qabyldaý rásimine kýá boldyq. Jas jaýyngerler «Otanymdy qorǵaımyn» dep jaýapkershilik aldy. Bul qasıetti borysh – ár azamattyń paryzy. Bıyl Halyq qaharmany Saǵadat Nurmaǵambetov­tiń jáne Reıhstagqa alǵash bolyp tý tik­ken Raqymjan Qoshqarbaevtyń týǵanyna 100 ­jyl toldy. Sizder osy batyr atalarymyz­dyń jolyn abyroımen jalǵaıdy dep sene­min. Bizdiń qatarymyzda áskerı istiń qyr-sy­ryn úırenesizder ári úlken ómir mektebi­­nen ótesizder. Jaýyngerlik jolda bir-birińiz­ge serik, tirek bolyńyzdar, – dedi general-­maıor A.Omarbekov.

Sondaı-aq qarashada jaýǵan qardyń qara sýyǵyna qaramastan, nemeresiniń qolyna qarý ustap, Otanyn  qorǵaýǵa sert bergen sátin kórýge kelgen jasy 73-tegi aqsaqal Jetkergen Kenjebaev ta el qorǵany bolýǵa bekingen balalaryna aq jol tilep, batasyn berdi.

–  Men de ózderiń sekildi kerzi etik kıip, Otan aldyndaǵy boryshymdy eki jyl Sverdlovsk qalasynda ótedim. Odan jaman bolǵan joq­pyn, ómirlik azyq bolar kókeıge kóp nárse túıip qaıttym. Balalarym, qabyldap jat­qan anttaryńa adal bolyp, jaýyngerlik min­­detterińdi laıyqty atqaryńdar. Elimiz­diń namysty da qaıratty er jigiti bolyp shyńdalyń­dar. Shynyn aıtqanda, Mem­le­kettik kúzet qyzmeti qatarynda áskerı min­detti atqarý – kóp jigittiń armany. Bir jyl otbasy­laryńnan jyraqta bolý, tártipke ba­ǵyný, komandırlerińnen kerek dúnıelerdi úırený – osynyń bári sender úshin úlken tájirıbe, úlken abyroı. Biz ózderińe sene­miz. Aman bolyńyzdar, halqyńa qadiri as­qan, mártebesi bıik azamat bolyńdar, – dedi qatardaǵy jas jaýynger Islam Bek­sul­tanulynyń atasy Jetkergen aqsaqal.

Ant qabyldaýdy Otanǵa, halqyńa adal qyzmet etý, tipti el basyna kún týǵan shaqta jan qııýǵa deıin sapta bolý dep túsinetinin jetkizgen qatardaǵy jaýynger Asqar Serik te elimizdi qorǵaýǵa ant etken qatarlastaryna júrekjardy lebizin bildirdi.

– Otan-Anany qorǵaý eń asqaq paryz, abyroıly mindet ekenin bile otyryp, bú­gin biz, jas aıbyndyqtar, saltanatty túr­de ant qabyldadyq. Ant qabyldaý – Ota­nyna, halqyna adal bolý, el basyna kún týsa, ony aqtyq demi qalǵansha qor­ǵaý. Qajet bolsa, jan qııý dep bilemiz. Osy­laısha, ulan-ǵaıyr jerimizdi aq bilektiń kúshimen, aq naızanyń ushymen qorǵaǵan jaýjúrek ata-babalarymyzdyń erlik jo­lyn jalǵastyrýshyǵa, el qorǵanyna, senim ar­qalaǵan azamatqa aınaldyq, – dedi qatardaǵy jaýynger I.Beksultanuly.

Osy kúni ant qabyldaǵan 200-ge tarta jas sarbaz endi MKQ áskerı bólimderinde merzimdi qyzmet atqara júre tájirıbeli nusqaýshylyq quramnyń jetekshiligimen áskerı iske mashyqtanyp, jaýyngerlik jáne arnaıy daıarlyq sabaqtarynda áskerı mamandyqtardy meńgeredi.

Memlekettik kúzet qyzmeti 0112-áskerı bóliminiń 6-basqarmasy 1-bóliminiń aǵa kúzet ofıseri, aǵa leıtenant Erjan Bek­bolatov­tyń aıtýynsha, ábden irikteýden ótken bul merzimdi qyzmet sarbazdary MKQ «Aı­byn» prezıdenttik polki atqaratyn Qazaqstan Respýblıkasynyń Memlekettik týy men Memlekettik eltańbasy etalondaryn kúze­tý, Memleket basshysynyń qatysýy­men óte­tin hattamalyq is-sharalarǵa qaty­sý, kúzetile­tin tulǵalar men nysandar­dyń qaýipsizdi­gin qamtamasyz etý sekildi mańyzdy mindet­terdi atqarmaq.

– Aıryqsha maqsattaǵy kúshterdiń qata­ryna 18 ben 27 jas aralyǵyndaǵy, boıy 180 sm-den joǵary jáne 195 sm-den aspaı­tyn, bilimi orta bilimnen tómen emes, den­saýlyǵy jaqsy kez kelgen azamat qosyla alady. Dese de irikteý kezinde joǵary bilimdi, sporttyq jetistikteri men razrıadtary bar úmitkerlerge basymdyq beriledi. Merzimdi áskerı qyzmetti Memlekettik kúzet qyz­meti qatarynda atqarý jas azamattar úshin naǵyz erlik mektebi bolmaq. Jastar úshin bul kezeń ári qaraıǵy mansap jolyn jalǵastyrý­ǵa negiz, áleýmettik saty bolýy múmkin, – deıdi aǵa leıtenant E.Bekbolatov.

Saltanatty jıyn barysynda qaty­sý­shylarǵa epti de som bilekti jaýyngerler­diń qoıan-qoltyq urys tásilderi, qarý-jaraq­pen saptyq óner kórsetý elementteri kórsetil­di. Al jıyn sońynda dástúr boıyn­sha sarbazdardyń týystaryna áskerı bólim­derge ekskýrsııa uıymdastyryldy. Elimiz­diń ár óńirinen kelgen ata-analar uldary­nyń oqý synyptaryn, kazarmalaryn, ashana­lar men turmystyq bólmelerin aralap kór­di. Sondaı-aq komandırlermen de emen-jar­qyn áńgimelesý is-sharasy uıymdastyry­lyp, ­ata-analar ózin qyzyqtyrǵan suraqta­ryn qoıyp jatty. Oǵan qosa qalǵan ýaqyt­ty ata-analar uldarymen birge ótkizip, kó­ńili kóterilip qaldy.