Qostanaı oblysynda Qazaqstan men Reseıdiń myńǵa jýyq birlesken kásiporny jumys istep jatyr. Sonyń biri – Qostanaı traktor zaýyty. Sankt-Peterbýrg traktor zaýytymen áriptestik baılanys aıasynda iske qosylǵan kásiporyn bes jyldyń ishinde 1200 «Kıroves» traktoryn jasap shyǵarǵan.
Buǵan deıin traktordy Reseıden bútindeı bólshek túrinde ákelip, ony tek qurastyrýmen ǵana shektelip kelgen kásiporyn keıingi bir-eki jyl ishinde «Kıroveske» qajet plastık bólshekterdi túgeldeı Qostanaıda óndire bastady. Zaýyt qýatty traktorǵa qajet 90 myńnan asa bólshekti ózi shyǵarady.
«Sankt-Peterbýrg traktor zaýytymen birlesken kásiporyn 2019 jyly iske qosyldy. Búginde bizdiń kásiporyn otandyq naryqta asa tanymal, eń bastysy, iri bólshekti qurastyrýdan usaq torapty qurastyrý óndirisine kóshe bastadyq. О́ndiriske buryn-sońdy bolmaǵan ozyq tehnologııalar men quzyretterdi engizdik, áli de engizip jatyrmyz. Plastıkten jasalatyn komponentter óndirisin iske qosý ońaı bolǵan joq. Zaýyt mamandary Sankt-Peterbýrgte oqyp keldi. Nátıjesinde, qazir traktordyń aldyńǵy jáne artqy dońǵalaqtarynyń jabyn qanattaryn, akkýmmýlıator batareıasynyń qaptamasyn, kabınanyń tóbesin jáne kapotty ózimiz jasaımyz. Ásirese, kapot jasaý asa qıyn. Ol úshin pishini ártúrli 19 qosymsha detal jasap shyǵarý kerek. Máselen, bir ǵana kapotty jasap shyǵarý úshin pishini, kólemi ártúrli qosymsha 19 bólshek shyǵaramyz. Jalpy, bir traktordy shyǵarý úshin oǵan qajet shamamen 90 jıyntyq shyǵaramyz. Onyń jalpy salmaǵy 1000 kg-dan asyp ketedi. Bir aýysymda osyndaı 360, al bir maýsymda 27 myń jıyntyq jasaımyz. Sondaı-aq traktordyń tepe-teńdigin saqtap turatyn qosalqy bólshekti de aýyr metaldan ózimiz úılestiremiz. О́ndiris barysynda biz ózimizden tehnıka satyp alyp jatqan sharýalardyń da tilegin eskeremiz. Osy maýsymda shyqqan traktorlarǵa «Weichai» qozǵaltqyshtary ornatylǵanyn da aıta ketý kerek», deıdi zaýyt basshysy Dınara Shúkijanova.
Kásiporyn basshysynyń aıtýynsha, Qostanaı traktor zaýyty búginge deıin óndiristi damytýǵa serpin beretin biraz sharýa tyndyrǵan. Búginde óndiristi óristetýge qajet zamanaýı qurylǵylar, senimdi seriktester bar. Qazir kásiporyn qýaty 300 jáne 420 at kúshine teń «Kıroves» traktorlaryn shyǵaryp jatyr. Traktorlardy áli de jańarta túsý josparlanyp otyr. Máselen, aldaǵy ýaqytta K-7M traktorlaryndaǵy jańa gıdrojúıeni birizdendirý josparlanyp otyr. Nátıjesinde, qýatty tehnıka qashyqtan basqarý júıesimen jabdyqtalady. Bul tehnıkanyń turǵan jerin, onyń jyldamdyǵyn, otyn shyǵynyn, qozǵaltqyshtyń jaı-kúıin onlaın rejimde baqylaýǵa múmkindik beredi.
Qostanaı traktor zaýytynyń dılerleri búginde Astana qalasy men elimizdiń 14 óńirine qyzmet kórsetedi. Keıingi jyldary otandyq naryqta eń kóp satylyp jatqan aýylsharýashylyq tehnıkasynyń biri de osy «Kıroves» traktory. Qostanaı zaýyty iske qosylǵan soń, aýyl sharýashylyǵyna taptyrmaıtyn qýatty tehnıkanyń satylymy eki jarym ese ósken.
«Elimizde jer ıgerip, dán egip otyrǵan iri sharýashylyqtar óte kóp. Sondyqtan Qostanaı traktor zaýyty sekildi aýylsharýashylyq jumystaryna paıdalanylatyn qýaty joǵary tehnıka shyǵaratyn kásiporyndardyń bolýy asa mańyzdy. Biz osydan kóp jyl buryn sharýashylyqta synap kóreıik degen maqsatpen bir «Kıroves» traktoryn satyp alǵanbyz. Úmitimiz aqtaldy. Qazir alqaptaǵy negizgi jumystyń bárin osy traktor atqarady. Búginde bizdiń sharýashylyqta 71 «Kıroves» traktory bar», deıdi Qarasý aýdanyndaǵy «Maks» jaýapkershiligi shekteýli seriktestiginiń basshysy Maksım Artemýk.
Qazir Qostanaı traktor zaýyty qýaty 350-den 460 at kúshine teń «Kıroves» traktorlarynyń K-735, K-739, K-742, K-743, K-746 tárizdi úlgilerin shyǵarady.
Búginde saýda-ekonomıka salasynda júzden astam elmen iskerlik yntymaqtastyq ornatqan Qostanaı oblysynyń eń iri áriptesteriniń biri – Reseı Federasııasy. Batys-Sibir jazyǵyn jaryp ótetin Tobyl ózeniniń qos ańǵarynda jatqan kórshiles aımaqtardyń arasyndaǵy taýar aınalymynyń jyldyq kólemi 2 mlrd dollardy quraıdy.
Qostanaı oblysy