2024 jyldyń 6 jeltoqsanynda Pavlodar qalasynda Beısen Ahmetov atyndaǵy joǵary pedagogıkalyq kolledjiniń 95 jyldyq mereıtoıyna arnalǵan saltanatty is-shara ótti, dep habarlaıdy Egemen.kz.
Mereıtoıǵa bilim berý salasynyń ókilderi, pedagogıkalyq eńbek ardagerleri, kolledj túlekteri men qala qonaqtary kelip, oqý ornynyń taǵylymdy tarıhyna taǵzym etip, jyly lebizderin bildirdi.
Merekelik sharalar kolledj janyndaǵy B.A. Ahmetovtiń eskertkishine gúl shoqtaryn qoıý rásiminen bastaldy.
Bul rásim – kórnekti ustazǵa degen qurmet pen onyń bilim salasyna qosqan úlesine degen iltıpattyń belgisi.
Aıtýly kún aıasynda «Mýzykalyq tárbıe ádistemesi» kabınetine Pavlodar óńiriniń pedagogıkalyq eńbek ardageri, kompozıtor ári mádenıet qaıratkeri Qaıyrbek Satıevtiń esimi berildi. Bul qadam ardagerlerdiń eńbegin ulyqtaýdyń jarqyn úlgisine aınaldy.
Kolledj oqytýshylary daıyndaǵan jańa oqý quraldarynyń tusaýkeseri jáne zamanaýı «SKILLSBOOST CENTER» kabınetin ashý sharalary oqý ornynyń bilim berýdegi jańashyl kózqarasyn kórsetti.
Stýdentter ózderiniń kásibı sheberligin is júzinde kórsetip, ashyq sabaqtar uıymdastyrdy. Bul – oqý ornynyń sapaly bilim berýdegi bıik nátıjeleriniń aıǵaǵy.
Merekelik is-shara M.M. Kataev atyndaǵy Oqýshylar saraıynda jalǵasyp, pedagogıkalyq eńbek ardagerleri men túrli jyldardaǵy túlekter kolledjdi mereıtoıymen quttyqtady.
Qonaqtar merekelik konsertti tamashalap, kolledjdiń eńbegi sińgen ustazdaryna qurmet kórsetilip, arnaıy marapattar tabystaldy.
Aıta ketsek, qarasha aıynan bastap Ahmetov atyndaǵy kolledjdiń 95 jyldyǵy aıasynda túlekter, ardager ustazdar, oqytýshylar men stýdentterdiń kezdesýleri ótti.
Ár bólim stýdenttik shaqtyń jarqyn sátterin eske túsirip, ustazdarymen qaýyshty.
Kezdesýler kolledjdiń bilikti mamandar daıarlaýdaǵy mańyzdylyǵyn aıqyndady.
B.Ahmetov atyndaǵy joǵary pedagogıkalyq kolledj – sapaly bilim men jańa býyn kóshbasshy mamandardy daıarlaıtyn Qazaqstandaǵy jetekshi oqý oryndarynyń biri.
Oqý orny 95 jyl boıy el damýyna úles qosyp kele jatqan bilikti pedagogterdi daıarlaýdyń úlgili ordasyna aınaldy.