Aqtóbedegi Eset batyr atyndaǵy sport mektebiniń 8-synyp oqýshysynyń ólimine qatysty is boıynsha oqýshy men stýdentke sot úkimi shyqty, dep habarlaıdy Egemen.kz.
Sot málimetinshe, bıyl 11 sáýirde Q.Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledjiniń 2-kýrs stýdenti osy oqý ornynyń erkin kúrespen aınalysatyn 8-synyp oqýshylarynyń tártipteri men sporttaǵy nátıjeleriniń nasharlaýyna baılanysty jınalys uıymdastyrý qajet dep sheshken. Sol kúni keshki jattyǵýdan keıin 8-synyptardyń oqýshylaryna mamandandyrylǵan mektep-ınternat-kolledjiniń bólmesine jınalý qajet ekenin aıtqan. Al olardy jınaýdy J.-ǵa jáne basqa da 9-10-synyptyń oqýshylaryna tapsyrǵan.
J. sottalýshy Q.-pen oıy bir ekenin bildirip, sol kúni saǵat 21:00 shamasynda 8-synyp oqýshylaryn bólmege jınaýǵa qatysqan. Keıin bólmege Q. kelip, 8-synyp oqýshylaryn bir sapqa turǵyzyp, olarǵa moraldyq jáne fızıkalyq qysym kórsetip, jınalys jasaýǵa eshqandaı ókilettigi bolmasa da, olardyń tártibi men sporttaǵy nátıjeleriniń tómendep ketkenin aıtyp, J.-ǵa jáne basqa da 9 jáne 10-synyptyń oqýshylaryna 8-synyp oqýshylaryn uryp ótýge nusqaý bergen.
Q. 9-synyp oqýshylary H. men U.-ǵa 8-synyp oqýshylaryn jaı urǵandaryn aıtyp, qaıta qattyraq urýdy talap etken. Olar qaıta 8-synyp oqýshylaryn uryp shyqqan.
- Keıin J. 8-synyp oqýshysy Á.-ge kelip, onyń eki betinen alaqanmen uryp, onymen toqtamaı, eki ıyǵynan eki qolymen ustap, oń tizesimen Á.-niń tós bóligine soqqy jasap, onyń densaýlyǵyna qasaqana aýyr zııan keltirgen. Sonyń saldarynan Á. esin joǵaltyp, arqasymen qulap, keıin qaıtys bolǵan, - dep jazylǵan habarlamada.
Sot otyrysynda prokýror sottalýshy J.-ǵa 6 jyl 8 aıǵa, Q.-ǵa 9 jylǵa bas bostandyǵynan aıyrý jazasyn taǵaıyndaýdy surady. Jábirlenýshiler jáne onyń ókili sottalýshylarǵa qatań jaza taǵaıyndaýdy surady. Sottalýshylar óz kinálaryn moıyndamady, al olardyń qorǵaýshylary Q.-ny aqtaýdy, al J.-nyń qylmystyq áreketterin QK-niń 104-babynyń 1-bóligine qaıta saralaýdy surady.
Sot qylmystyq jaza taǵaıyndaý kezinde sottalýshylardyń buryn sottalmaǵanyn, sottalýshy J.-nyń kámelet jasqa tolmaǵanyn qylmystyq jaýaptylyq pen jazasyn jeńildetetin mán-jaı dep tanydy. Aýyrlatatyn mán-jaılar anyqtalmady.
Sot úkimimen sottalýshy Q. kináli dep tanylyp, oǵan 9 jyl merzimge bas bostandyǵynan aıyrý jazasy, al sottalýshy J. kináli dep tanylyp, oǵan 6 jyl 8 aı merzimge bas bostandyǵynan aıyrý jazasy taǵaıyndaldy.