Jýyrda Taılandtyń Chıangmaı qalasynda bokstan Azııa chempıonaty ótkeni belgili. 71 kg salmaqta synǵa túsken Abylaıhan Júsipov fınaldyq aıqasta ózbekstandyq Havasbek Asadýllaevqa ese jiberip, kúmis medaldy mise tutqan edi.
Osy jekpe-jekte Havasbek Abylaıhannyń ıyǵynan tistep alǵanyn rıngtegi referı de, qaýmalaı otyrǵan tóreshiler de baıqamaǵan bolatyn. Elimizdiń boks federasııasy IBA, ASBC uıymdaryna resmı hat joldap, fınaldyq aıqasta ózbek boksshysynyń kópe-kórineý ereje buzǵanyna shaǵym túsirdi. Beınejazbany muqııat zerdelegen jaýapty mamandar jekpe-jek qorytyndysyn qaıta qarap, altyn medal Abylaıhanǵa tıesili degen sheshim shyǵardy. Sol jekpe-jekte referı bolǵan serbııalyq maman Djovanna Ýgrenovıchtiń kásibı qyzmetine de syn aıtyldy. Qyrshańqy Havasbek endi belgilengen merzimge deıin saıystarǵa qatysa almaıdy.