Qazaqstannyń eńbek sińirgen muǵalimi, KSRO Memlekettik syılyǵynyń laýreaty Qanıpa Bitibaeva ótken jyldyń qyrkúıeginde máńgilik saparǵa attanǵan edi. Búgin onyń týǵanyna 70 jyl tolyp otyr. Sol ataýly mereıtoıy qarsańynda ult ustazy eńbek etken mektepte jeke murajaı ashyldy. Jambyl atyndaǵy bilim uıasynda aty ańyzǵa aınalǵan ulaǵatty ustaz ǵumyrynyń teń jartysyn ótkizip, myńdaǵan shákirtiniń júregine bilim shamshyraǵyn jaqty. Oqýshylary san qyrly ónerimen tańǵaldyratyn bul qara shańyraq sonaý keńestik ýaqytta ózge ulty kóp qalada ulttyq rýhtyń oshaǵy boldy. Sonyń bastaýynda Qanıpa Omarǵalıqyzy turyp, ózgelerdi jumyldyryp Abaı, Shákárim, Muhtar taǵylymy arqyly keleshek urpaqtyń sanasyn oıatýǵa qyzmet etkeni aıtarlyqtaı erlik. El azamattary, shákirtteri, týystary Qanıpa apanyń ózi turǵan úıine memorıal-taqta ornatty. S.Amanjolov atyndaǵy Shyǵys Qazaqstan memlekettik ýnıversıtetinde ǵylym salasynda júrgen izbasarlarynyń uıymdastyrýymen ustazdyń atynda dárishana ashylyp, estelikter kitabynyń tusaýy kesildi, eske alý keshi ótti. Sondaı-aq, Qanıpa Bitibaeva atyndaǵy qazaq tili men ádebıetinen ótken respýblıkalyq olımpıadaǵa elimizdiń túkpir-túkpirinen 150-ge jýyq oqýshynyń kelýi de ustaz esimin ulyqtaýda atqarylyp jatqan ıgi sharalardyń biri boldy.
Saltanatty jıynǵa mektep ujymymen birge qaladaǵy basqa bilim ordalary da atsalysty. Máselen, №16 mekteptiń «Murager» orkestriniń ónerpazdary kúmbirlete kúı oınasa, Ekspo-2017 negizinde uıymdastyrylǵan oqýshylar jobalarynyń kórmesi ótti. Sondaı-aq, saltanatty sharaǵa qatysýshylar qazaq tili men ádebıetin oqytýdyń tıimdi ádis-tásilderin pedagogıka tájirıbesine engizý bolyp tabylatyn Q.Bitibaevanyń zerthanasynda oqýshylardyń ǵylymı jobalary tanystyryldy. Árıne, is-sharanyń basty kezeńi – Q.Bitibaeva murajaıynyń saltanatty ashylýy boldy. Oblys ákiminiń orynbasary Jaqsylyq Omar ult ustazynyń elimizdiń bilim salasyn damytýǵa qosqan eleýli eńbegin aıryqsha atap ótti. Atalǵan sharaǵa Astanadan arnaıy kelgen pýblısıst-jazýshy, «Egemen Qazaqstan» gazetiniń sholýshysy Súleımen Mámet Qanıpa Bitibaevanyń klassıkalyq jáne qazirgi kezeń ádebıetiniń estetıkalyq syryn, Abaı, Muhtar ómiri men shyǵarmashylyǵy negizinde qazaq halqynyń rýhanı mádenıetin tereń uǵynýdaǵy eńbegin erekshe atap ótti.
Saltanatty shara sońy ulaǵatty ustazdyń rýhyna arnalǵan as berýge ulasty.
Jıynǵa ustazdyń zamandastary, áriptesteri men shákirtteri, S.Amanjolov atyndaǵy Shyǵys Qazaqstan memlekettik ýnıversıteti, «О́rleý» BAUO» AQ oblystyq fılıaly jetekshileri men ókilderi jáne óńirdegi mektep ustazdary, ardager-pedagogtar qatysty.
Muǵalim murajaıynyń ashylýyna barlyq qamqorlyqty jasaǵan oblys ákimdiginiń bilim basqarmasynyń, ony utymdy uıymdastyrǵan Jambyl atyndaǵy daryndy balalarǵa arnalǵan mektep-gımnazııa-ınternaty ujymynyń eńbegin atap ótýdi paryz sanaımyz.
Dýman ANASh,
«Egemen Qazaqstan».
О́SKEMEN.