Keshe Astanadaǵy Ulttyq akademııalyq kitaphanada Baspasóz, televızııa jáne radıo kúni qarsańynda Qazaqstan halqy Assambleıasy janyndaǵy etnosaralyq qatynastar máselesine qatysty jetekshi jýrnalıst-sarapshylar klýbynyń alǵashqy otyrysy bolyp ótti. Kún tártibinde – El birligi doktrınasyn júzege asyrý máseleleri, sonymen qatar, birtutas aqparattyq keńistiktiń qurylýy.
Klýb Qazaqstan halqy Assambleıasy janyndaǵy turaqty jumys isteıtin keńestik-saraptyq jáne aqparattyq organ bolyp tabylady. Quramyna etnosaralyq taqyrypty qozǵaıtyn respýblıkalyq, jergilikti buqaralyq aqparat quraldarynyń jetekshi jýrnalısteri jáne etnosaralyq qarym-qatynastar salasyndaǵy sarapshylar kiretin klýbtyń ashylýy Assambleıanyń 15-sessııasy barysynda qabyldanyp, al tusaýkeseri ótken jyldyń 17 qarashasynda ótken bolatyn.
Alǵashqy otyrysqa Assambleıa Tóraǵasynyń orynbasary, hatshylyq meńgerýshisi Eraly Toǵjanov, Baılanys jáne aqparat vıse-mınıstri Nuraı Orazov, L.N.Gýmılev atyndaǵy Eýrazııa ulttyq ýnıversıteti jýrnalıstıka jáne saıasattaný fakýltetiniń kafedra meńgerýshisi, professor Ǵ.Shaıahmetov, sondaı-aq birqatar basylymdardyń bas redaktorlary qatysty. Aldymen kele jatqan jýrnalıster merekesimen quttyqtaǵan Eraly Toǵjanov kózge kórinbeıtin, qolǵa ustalmaıtyn etnostyq máseleniń óte kirpııazdyǵyn aıtyp ótti. Alysqa barmaı-aq, kórshiles qyrǵyz elin alyp qaralyq. Etnostyq másele degenimiz osy, dedi ol.
Budan soń otyrys taqyryby Qazaqstannyń El birligi doktrınasyna oıysty. Qazaqstannyń El birligi doktrınasynyń negizgi oıy da, maǵynasy da – táýelsizdik. Ondaǵy úsh bólim sol táýelsizdikti ári qaraı nyǵaıta túsýge baǵyttalǵan. Sondyqtan Qazaqstan úshin táýelsizdikten artyq qasıetti, tereń qundylyq bolýy da múmkin emes. Elimizge táýelsizdik 1991 jyly kelgenimen, onyń qalyptasý kezeńi bertinge deıin birtindep júzege asty. Al qazirgi ýaqytta biz sol jyldary elimizdiń táýelsizdik irgetasy myqty qalanǵanynyń kýási bolyp otyrmyz. Doktrınada aıtylatyn kóp másele – jańa uǵym. Táýelsizdikti el birligi arqyly nyǵaıtý máselesi – eń mańyzdy másele. Buryn biz jalpy qoǵamdyq kelisim týraly sóz qozǵap kelgen bolsaq, búgingi kúni naqty eldiń birligi týraly máseleni alǵa shyǵaryp otyrmyz, dep atap ótti Qazaqstan halqy Assambleıasy Tóraǵasynyń orynbasary.
Klýb músheleri otyrysynyń ekinshi jartysynda “Kazahstanskaıa pravda” respýblıkalyq gazetiniń bas redaktory Tatıana Kostına osy gazettegi etnostyq taqyrypta jarııalanatyn materıaldar týraly sheberlik-synyptaryn ótkizdi.
Venera TÚGELBAI.