Elimiz tarıhynyń jańa belesi

Ult birligi –  uly baılyq

1995 jyly qurylǵan Qazaqstan halqy Assambleıasy beldi de bedeldi uıymǵa aınalyp qana qoımaı, sonymen qatar, shetelderge de keńinen tanylyp keledi. Onyń ústine jaqynda ǵana Assambleıanyń HHII sessııasy ótkeni belgili. Qazaqstan halqynyń birligi kúni merekesine oraı keshe QHA músheleri «Qazaqstan halqy Assambleıasy jylynyń aralyq qorytyndysy týraly» arnaıy baspasóz máslıhatyn ótkizdi. Atalǵan sharaǵa qatysýshylar Qazaqstan halqy Assambleıasy jylynyń basty joba-jospar­lary men «Máńgilik El: bir el – bir taǵdyr» kún tártibimen ótken Qazaqstan halqy Assambleıasynyń HHII sessııasynyń qorytyn­dy­laryn baıandap, QHA jylyna qoıylǵan tapsyrmalardy iske asyrý boıynsha bolashaq josparlarymen tanystyrdy. Bul joly buqaralyq aqparat quraldary ókilderiniń aldyna Qazaqstan Prezıdenti Ákimshiligi Qazaqstan halqy Assambleıasy sektorynyń meńgerýshisi Leonıd Prokopenko, QHA múshesi, L.N.Gý­mılev atyndaǵy Eýrazııa ulttyq ýnıversıtetiniń QHA kafedra­synyń meńgerýshisi Anatolıı Bashmakov, Qazaqstan Prezıdenti janyndaǵy Memlekettik basqarý akademııasynyń ultaralyq baılanystardy zertteý ortalyǵynyń basshysy Aıgúl Sádýaqasova jáne Qaraǵandy oblystyq «LITUANICA» lıtva mádenı birles­ti­giniń tóraǵasy Vıtalıı Tvarıo­nas shyqty. Aldymen sóz alǵan sektor meń­gerýshisi bıylǵy barlyq is-shara­lar Assambleıa jyly aıasynda ótip otyrǵandyǵyna nazar aýdart­ty. Sondaı-aq, L.Prokopenko kezek­ten tys prezıdenttik saılaý­da­ǵy N.Á.Nazarbaevtyń jeńisi ha­lyqtyń Elbasy reformalarynyń baǵytyn qoldaıtyndyǵyn kórset­kendigin tilge tıek etti. Sondyqtan da, ulyqtaý rásimi táýelsiz Qa­zaq­stan tarıhynda damýdyń jańa kezeńine aıaq basýdyń bastapqy núktesi bolyp tabylady. Munyń barlyǵy «Nurly Jol» Jańa Ekonomıkalyq Saıasatymen, bes ınstıtýttyq reformamen jáne «Máńgilik El» jalpyulttyq jobasymen qabysyp jatyr. Árıne, munyń barlyǵy jahan­dyq kúrdeli geosaıası jaǵdaı men álemdegi áskerı-saıası shıelenistiń órbýine qaramastan, Qazaqstannyń álemdegi asa damyǵan 30 eldiń qataryna qosylýyna jetkizýi tıis. Bul turǵydan kelgende, Pre­zı­denttiń beıbitshilik pen kelisim saıasaty reformalar júrgizýdi qamtamasyz etip otyr. Budan keıin sóz alǵan L.N.Gý­mılev atyndaǵy Eýrazııa ult­tyq ýnıversıtetiniń QHA kafe­d­rasynyń meńgerýshisi bıyl­ǵy Assambleıa jyly rýhanı tolysý jyly bolýǵa tıis degen­di basa aıtty. Anatolıı Bash­ma­kovtyń sózine qaraǵanda, tórt negizgi aıtýly mereke bir-birine sáı­kes kelmeıtindeı sııaqty kórin­geni­men, olardyń astarynda ózindik bir baılanys jatyr. Eger osylardy qasterleı bilsek, onda óskeleń urpaqtyń boıynda óz tarıhyna degen qurmetti qalyptastyra alamyz, degen kafedra meńgerýshisi Elbasynyń senimdi ókili retinde óńirlerdi aralaǵan kezinde tur­ǵyndardyń rýhanı qýatyn sezin­gendigimen de bólise ketti. «Kez kelgen shetelderde pre­zıdenttik saılaýda ár kandıdatty qoldaǵan halyq jaq-jaqqa bólin­se, Qazaqstanda kerisinshe saıası naýqan kezinde halyq judyryqtaı jumyla túskendigin kórsetti», dedi A.Bashmakov. Prezıdent janyndaǵy Mem­le­kettik basqarý akademııasynyń ultaralyq baılanystardy zertteý ortalyǵynyń basshysy Aıgúl Sádýaqasova «Búginnen bastap elimizdiń jańa tarıhı beti ashyldy deýge bolady. О́ıtkeni, keshe ǵana Qazaqstan Respýblıkasynyń Prezıdenti óz laýazymyna taǵaı­yndalyp, óz qyzmetin bastap ketti. Bıylǵy Qazaqstan halqy Assambleıasynyń 20 jyldyǵymen baılanysty kóptegen sharalar iske asyp jatyr. QHA biriktirýshi ınstıtýt retinde qalyptasty, Elbasynyń ózi aıtqandaı, 17 mıllıon qazaqstandyqtyń basyn qosyp, bir maqsatqa jumyl­dyrdy. Qazaqstandyqtardyń bir adamdaı óz tańdaýlaryn jasaýy – osy jumystyń nátıjesi», dedi. Qaraǵandy oblystyq «LIT­UANICA» lıtva mádenı birles­tiginiń tóraǵasy óz kezeginde óńirde 24 etnomádenı birlestiktiń nátıjeli jumys jasaıtyndyǵyna nazar aýdartty. Vıtalıı Tvarıonas bul birlestikter ózderiniń tarıhı otandarymen baılanystar ornatyp qana qoımaı, Qazaqstan halqynyń birligi men tutastyǵyna erekshe úles qosyp ta kele jatyr degendi basa aıtty. Sondaı-aq, Assambleıa músheleri óńirde sý tasqyny saldarynan japa shekkenderge naqty kómekter kórsetip, arnaıy esepshotqa 6 mıllıon teńge de aýdarypty. Jáne de qoldaý retinde birneshe tonna bolatyn ártúrli júkter men azyq-túlikter jetkizip berilgen. Al jaqynda ótken kezekten tys saılaý halqymyzdyń tutastyǵy men birligin jáne de halqymyzdyń jasampazdyqqa umtylýyn taǵy bir pash etti, dedi mádenı birlestik tóraǵasy. Asqar TURAPBAIULY, «Egemen Qazaqstan».