Memleket basshysynyń «Ana tili» gazetindegi suhbatynda elimizdiń damýyna qatysty birshama ózekti máseleler aıtylǵan. Sonymen qatar josparlanǵan mańyzdy bastamalar talqylandy.
Jalpy bilim jáne ǵylym salasynda qyzmet atqaryp, jastardy tárbıeleýge atsalysyp júrgendikten, olardyń ıgiligi úshin iske asyp jatqan reformalarǵa toqtalyp ketsem deımin. Prezıdentimiz jastar ıgiligi úshin jasalynyp jatqan reformalar memleket strategııasynyń túpki máni ekenin basa aıtty. Sonymen birge osy jyldy «Jumysshy mamandyqtar jyly» dep jarııalaǵanyna da toqtaldy. Al jahandaný úderisiniń bir ereksheligi retinde jastardyń bilim alý maqsatynda nemese qyzmette ósý úshin shetelge kóptep shyǵýyna túsinistikpen qaraýǵa shaqyrdy.
Jas ǵalymdardyń halyqaralyq «Bolashaq» stıpendııasynyń sheteldegi ǵylymı ortalyqtarda taǵylymdamadan ótýi – zor múmkindik. Rasymen osyndaı sapaly ǵylymı taǵylymdamalar elimizge aýadaı qajet. Sondaı-aq ulttyq ıdeologııany qalyptastyrýǵa qatysty zertteýler júrgizý, halqymyzdyń salt-dástúri men mádenıetin dáriptep, elimizdiń abyroı-bedelin arttyrýǵa atsalysý maqsatynda halyqaralyq «Bolashaq» baǵdarlamasymen múmkindiginshe oqytýshylardy, zertteýshilerdi álemniń beldi ýnıversıtetterine jiberýge basymdyq bolsa deımiz.
Búginde shetelde bilim alý oryndalmaıtyn arman emes. Naqty maqsatty kózdep, alǵa – bilim men tabys jolyna umtylǵandar úshin álemniń barlyq elderiniń eń bedeldi ýnıversıtetteri men kolledjderiniń esigi árdaıym ashyq. Taǵylymdama barysynda alǵan tájirıbemizdi elimizge tanystyrý, sondaı-aq sheteldik áriptesterimizben tyǵyz baılanys ornatyp, óz salamyz boıynsha birikken túrli is-sharalardy uıymdastyrý bilim-ǵylym salasynyń damýyna septigin tıgizer edi. Prezıdentimiz aıtqandaı, Qazaqstan degen brendti álemge tanytý mańyzdy mıssııamyz bolý kerek.
Gúlnash Ashat,
Abylaı han atyndaǵy Qazaq halyqaralyq qatynastar jáne álem tilderi ýnıversıtetiniń kafedra meńgerýshisi, PhD