Baıaǵy jartas, sol jartas. О́skemenniń qýys kóshesindegi Daryndy balalarǵa arnalǵan oblystyq mamandandyrylǵan mektep-lıseı-ınternatynyń máselesi sol kúıi, búgin-erteń sheshile qoımaıtyn sekildi. Tozyǵy jetken ınternattyń oqýshylary baıaǵydaı bótelkege sý jylytyp jýynady, qolaısyz ashanada tamaqtanady, taǵysyn taǵy. Buǵan qatysty pikir bildirgen bilim basqarmasy ókilderi másele osy jyly sheshiledi desken.
Quzyrly organdar bıyl О́skemenniń 19-shaǵyn aýdanyndaǵy qurylysy jol ortada toqtap qalǵan kolledj ǵımaraty fızıka-matematıka baǵytyndaǵy Daryndy balalarǵa arnalǵan mektep-lıseı-ınternatyna beriledi dep málimdegen. Alaıda qańyraǵan ǵımarattyń mańaıynda qybyr etken tirshilik joq. Eske salsaq, byltyr oblystyń bilim basqaramasy basshysynyń sol kezdegi orynbasary Nurtýǵan Maratuly 2025 jyly bilim ordasyna arnalǵan ǵımarattyń qurylysy aıaqtalady degen. Qurylys bıyl aıaqtalýy úshin jumys byltyr bastalýy kerek edi.
«Máseleni sheshýdiń birden-bir joly – Ilııas Esenberlın dańǵyly boıyndaǵy 880 oryndyq ǵımaratty osy lıseı-ınternatqa berý. Ol alǵashynda kolledj retinde boı kótergen. Qazirgi tańda qurylysy toqtap tur. Qatelespesem, naýryz aıynda «VK Invest kompanı» merdiger kompanııasy ol nysandy satyp alǵan. Biraq qurylysy mektepke baǵyttalǵan. 2025 jyly atalǵan merdiger kompanııa qurylysty aıaqtaıdy. Qazir ekspertızalyq jumystar júrgizilip jatyr. Bári zerttelgen soń qurylysqa kirisedi», dep edi basqarma basshysynyń orynbasary 2023 jyly bergen suhbatynda.
Odan beri jyldan asty. Daryndy balalar sol baıaǵy eski mektepte bilim alyp, ystyq sýsyz ınternatta turyp jatyr. Al Prezıdent tehnıkalyq mamandyqqa kóńil bólý kerektigin bir emes, birneshe qaıtara aıtqan. Ol sózge qulaq asyp otyrǵan oblysta qaı basshy bar?
Biz kótergen bul másele bir orynda turalap qalǵan soń jýyqta oblystyq bilim basqarmasyna taǵy da resmı suraq joldaǵanbyz. Onyń ústine, aldyńǵy jylǵy bergen málimetteri sıyrquıymshaqtanyp ketken. Bul oraıda BAQ ókilderiniń maqsaty bireý: fızıka-matematıka baǵytynda oqyp júrgen oqýshylardyń jaıly mektepte bilim alýyna septesý. Áıtpese, qazirgi mekteptiń ózi de, ınternaty da jaǵa ustatarlyqtaı. Ol týraly «Egemen Qazaqstan» gazetine 2023 jyldyń jeltoqsanynda tarqatyp jazǵanbyz. Odan beri eshqandaı oń ózgeris joq. Bilim basqarmasy joldaǵan bıylǵy jaýapqa úńilsek, «BK Invest kompanı» merdiger kompanııasy jobalaý jumystaryn jalǵastyryp, ony ekspertızaǵa kirgizýge daıyndap jatyr. Sonymen qatar jer ýchaskesin rásimdeý jumystary da qolǵa alynypty. Alaıda qurylystyń naqty qashan bastalyp, qashan aıaqtalatyny jóninde aqparat joq. Soǵan qaraǵanda bolashaq ınjenerler men tehnıka tilin biletin mamandar jaılylyqtan jurdaı ınternatta turyp, qaltarystaǵy bilim oshaǵynda bilim alýlaryn jalǵastyra bermek.
О́skemen