Toǵyzqumalaq sporty federasııasynyń prezıdenti bolyp Ákim Tursun saılandy. Al buǵan deıin respýblıkalyq federasııany basqarǵan qoǵam qaıratkeri Álıhan Baımenov uıymnyń Qurmetti prezıdenti bolyp bekitildi, dep habarlaıdy Egemen.kz.
Astanada ótken respýblıkalyq federasııanyń jıynynda Álıhan Baımenov osy kúnge deıin Toǵyzqumalaq sporty federasııasy vıse-prezıdenti qyzmetin atqarǵan Ákim Tursundy federasııa basshysy qyzmetine usyndy. Otyrysqa qatysqan óńirlik federasııa jetekshileri, toǵyzqumalaq qaıratkerleri jáne federasııa basshylyq quramy usynysty qoldap, Tursundy Toǵyzqumalaq sporty federasııasy prezıdenti laýazymyna saılady.
Sondaı-aq bul basqosýda respýblıkalyq federasııanyń vıse-prezıdentteri laýazymyna Batyrbek Qulekeev, Sholpan Qadyrova, Maqsat Shotaev, Dáýlet Ábdikárimov saılandy. Maqsat Shotaev vıse-prezıdenttikpen birge Dúnıejúzilik toǵyzqumalaq federasııasynda bas hatshy qyzmetin atqarady. Federasııanyń qurmetti prezıdenti, prezıdent, vıse-prezıdent jáne bas hatshy qyzmetteri - qoǵamdyq negizdegi jumys. Al QR Toǵyzqumalaq sporty federasııasy PR dırektory laýazymyna jýrnalıst Rıshat Asqarbekuly taǵaıyndaldy.
Otyrys barysynda Dúnıejúzilik toǵyzqumalaq federasııasynyń prezıdenti Alıhan Baımenov jınalǵandarǵa 2024 jyly atqarylǵan jumystar men sharalardyń esebi boıynsha aqparat berdi. О́tken jyl ulttyq zııatkerlik oıynnyń erekshe damý jyly bolǵanyn jáne 5-shi Dúnıejúzilik kóshpendiler oıyny eldegi tarıhı oqıǵalardyń biri ekenin atap ótti. Bul jyly dástúrli júzdegen sharamen qatar tyń jáne iri jańalyqtar mol boldy.
Bul is-sharalar Dúnıejúzilik jáne QR Toǵyzqumalaq sporty federasııasy men óńirlerdegi toǵyzqumalaq federasııalarynyń, QR Týrızm jáne sport mınıstrliginiń, Oqý-aǵartý mınıstrliginiń, Sportty qoldaý qorynyń jáne jergilikti ákimdikterdiń, sport basqarmalarynyń tyǵyz áriptestigimen toǵyzqumalaq janashyrlary, demeýshi kásipkerlerdiń qoldaýy arqasynda júzege asyryldy.
Aıta keteıik, Álıhan Baımenov respýblıkalyq federasııany 2004-2025 jyldar aralyǵynda basqardy.