Jyl basynda Beıneý astyq termınaly ekinshi ret ashyldy. Alǵash iske qosylǵan 2010 jyldary ataǵy da, astyǵy da alysqa ketip, kebegimen tóńirektegi mal toıynǵan termınal 16 gektar jerge ornalasyp, aýmaǵynda astyq óńdeý sehy jáne jem óndirý boıynsha avtomattandyrylǵan sehtar men elevator jumys istegen edi.
Munaı ken oryndarynan shalǵaılaý jatqandyqtan ba, turǵyndary munaıshylyq jumysqa kóp ilige bermeıtin Beıneýdiń sanaýly jurty termınaldan turaqty jumys taýyp, nápaqasyn aıyrdy. Alaıda qarjylyq kedergilerge baılanysty termınal 2018 jyly jumysyn toqtatty.
Endi, mine, araǵa 6 jyl salyp qaıta ashylyp otyr. Jalpy aýdany 26 gektardy quraıtyn Qazaqstan – Túrikmenstan shekarasyna tikeleı shyǵýǵa múmkindik beretin 8 shaqyrymdyq temirjoly, óziniń jyljymaly quramy bar perspektıvaly logıstıkalyq hab bolyp sanalady. Jumysyn qaıta bastaǵan termınalǵa 10 vagon, ıaǵnı 700 tonna bıdaı keldi. Astyqtyń 75 paıyzynan un shyqsa, 25 paıyzynan kebek óndiriledi.
Ashylý saltanatynda Beıneý aýdanynyń ákimi Rahymjan Shalbaev jáne aýdandyq máslıhat tóraǵasy Ardaq Borash un shyǵarý jumysymen tanysyp shyqty. Aýdandyq ardagerler keńesi tóraǵasynyń orynbasary Qadyr Sársen ıgi istiń bastaýyna batasyn berdi.
Termınaldyń qýattylyǵy bir mezgilde 100 myń tonna astyq saqtaýǵa múmkindik berip, táýligine 320 tonna un men 80 tonna kebek óndiredi. Jańǵyrtýdan keıin 400 tonna un jáne 240 tonna qurama jem berýge qaýqarly bolmaq.
Gazetimizdiń 2024 jylǵy 1 maýsymdaǵy sanynda «Astyq termınaly óndiristik qýatty eseleıdi» taqyrybymen astyq termınalyn qaıta iske qosýdyń uıymdastyrý jumysy týraly egjeı-tegjeı baıandaǵan edik. Endi «Eýrazııa Trans Logıstık» JShS «Kaspıı» áleýmettik-kásipkerlik korporasııasymen birlesip, astyq termınalynyń qaıta iske qosylýyna muryndyq boldy. Jaýapty mekemelerdiń usynysqa der kezinde nazar aýdarǵanyna biz de alǵysymyzdy bildiremiz.
Mańǵystaý oblysy