Qazaqstan 2024 jyldyń 9 aıynda $471 mln-ǵa IT-qyzmetterdi eksporttady. Bul týraly Úkimet otyrysy barysynda sıfrlyq damý, ınnovasııalar jáne aeroǵarysh ónerkásibi mınıstri málimdedi, dep habarlaıdy Egemen.kz Úkimettiń baspasóz qyzmetine silteme jasap.
Jaslan Mádıevtiń aıtýynsha, bul kórsetkish 2023 jyldyń sáıkes kezeńimen salystyrǵanda 26%-ǵa artyq. Degenmen, 2024 jyldyń qorytyndysy boıynsha odan da joǵary sandar kútiledi. Vedomstvonyń boljamy boıynsha, IT-qyzmetter eksportynyń somasy shamamen $700 mln-dy quraýy múmkin.
«Qazaqstannyń IT-eksportyn ilgeriletý kezinde Astana Hub basty ról atqarady. Ondaǵy rezıdentter sany 1,5 myń kompanııadan asty, onyń ishinde 400-i halyqaralyq kompanııa. Olardyń jalpy kirisi 2024 jyly 620 mlrd teńgeni qurady. Bul rette eksporttan túsetin tabys – 227 mlrd teńge, ıaǵnı $479 mln», delingen habarlamada.
Aıta keteıik, Astana Hub rezıdentteriniń eksporttyq geografııasy 90-nan astam eldi qamtıdy. Astana Hub rezıdentterinen basqa «Ulttyq aqparattyq tehnologııalar» AQ-nyń GovTech ónimderi alǵash ret eksportqa shyqty. Mundaı sheshimderdiń qataryna Smart Data Ukimet, Smart Bridge jəne IRBP veb-saıt qurastyrýshysy kiredi.