ELBASY QOLYNAN SYILYQ ALǴAN KÚN

Ertis ózeni jaǵalaýynda kerile kósilgen kelbetti Kereký óńiri ásem qala – oblys ortalyǵymen de maqtana alady. Bul kúnderi “Jol kartasy” baǵdarlamasy boıynsha qala kóshelerin kóriktendirý jumystary júrgizilýde. Ortalyq alańda birinen soń biri sap túzegen aqshańqan kólikter de qazdaı tizilip tura qalypty. О́zderine beriletin mundaı tamasha syılyqty alýǵa kelgen bilim berý, densaýlyq saqtaý salalary qyzmetkerlerimen qatar, quqyq qorǵaý organdarynyń ókilderi de aıryqsha qýanysh qushaǵynda. Oblysqa jasaǵan eki kúndik sapary aıasynda óndiris maıtalmandary – metallýrgterge sáttilik pen tabys tilep qoshtasqan Prezıdent Nursultan Nazarbaev, budan keıin keshe, túske qaraı oblys ortalyǵyndaǵy alańda áleýmettik sala qyzmetkerlerimen kezdesti. – Úlken ister júzege asyrylyp jatqan sizderdiń óndiristi óńirle­ri­ńizge kelgenime qýanyshtymyn. Keshe, ózderińiz bilesizder, elek­tro­lız zaýytynyń ekinshi kezegin iske qostym. Zaýytta 2 myńnan asa adam jumys isteıdi. Oblys boıynsha ındýstrııalyq baǵdarlamany oryn­daý jóninde kóp sharýalar ja­sa­lýda. Osy jartyjyldyqta 12 jańa óndiris orny iske qosylmaqshy. Bu­dan 8 myń adam jumys oryndaryn tabatyn bolady. Halyqtyń ál-aýqa­ty kóteriledi. Keıingi toǵyz jyldyń ishinde oblysta óndiris salasy 4,5 ese ósse, aýyl sharýa­shy­lyǵy 4 ese ósip, osyndaı jetis­tik­terdiń barlyǵy táýelsiz elimizdiń ósip-órkendeýine úles bolyp qosylýda. Áleýmettik sharalar qa­ta­rynda densaýlyq saqtaý,bilim berý salalary boıynsha arnaıy baǵdarlamalar jasalyp jatyr. Mek­tepter, aýrýhanalar salý, olar­dy jóndeý – barlyǵy da mem­le­kettiń qoldaýymen júzege asyry­lý­da. Bıylǵy jyldyń sáýir aıy­nyn bastap dárigerler men muǵa­lim­derdiń jalaqylary 25 paıyzǵa kóterildi. Sizder úshin úlken qýa­nysh, muǵalimder men dárigerler degen sóz – ár otbasyna jasaǵan memlekettiń kómegi. Quqyq qorǵaý organdary da ózderiniń mindetterin abyroımen oryndaýda. Bul úshin de tehnıkalyq kómek árdaıym kerek. Búgin, mine, sizdermen osy bir sal­tanatty jaǵdaıda kezdesip turmyz. Arnaıy kólikter ınternattarǵa, quqyq qorǵaý oryndaryna, aýrý­ha­nalar men mektepterge beriledi. Qutty bolsyn! – dedi Elbasy óziniń quttyqtaý sózinde. Kúni keshe ǵana elimizdiń den­saý­lyq saqtaý salasynyń qyzmet­ker­leri men quqyq qorǵaýshylary ózderiniń tól merekelerin atap ótkeni belgili. Osy oraıda Elbasy ár sala qyzmetkerleriniń ókilderin ortaǵa shaqyryp, kólikterdiń kiltterin tapsyrdy. Olardyń qata­rynda Saıan Muqanov, Gúlmıra Shu­ǵabaeva, Esjan Qanafııauly, Irına Mıshenko, Maqsat Qobja­nov, Baýyrjan Úmbetov, Elena Sher­bına, Marǵulan Zýbaırov syndy ár sala ókilderi – muǵalim­der, dárigerler, balalardy óz ómi­rin qaterge tigip, órt ishinen aman alyp qalǵan B.Úmbetov sııaqty búgingi kúnniń batyrlary da bar. Dáriger I.Mıshenko óz áriptes­teri­niń biryńǵaı densaýlyq saqtaý júıe­siniń jańa baǵyty boıynsha atqaryp jatqan jumystaryna oraı aldaǵy ýaqytta tynymsyz eńbek kútip turǵanyn aıtyp ótti. Bar­ly­ǵy keýdelerine qoldaryn qoıyp, óz­deriniń el aldyndaǵy qyzmet­te­rin baǵalap kelgen mártebeli El­ba­syna shyn júrekten ystyq yqy­las, alǵystaryn bildirip jatty. Kiltti tabystaǵan saltanatty rá­simnen soń Prezıdent qýanysh ıelerin quttyqtap, qyzmette yń­ǵaıly jańa kólikterdi aralap kórip shyqty. Kúnmen shaǵylysyp jar­qy­rap turǵan 77 avtokóliktiń 57-si oblystaǵy ishki ister organdaryna, 10-y oblys ortalyǵy men Eki­bastuz, Aqsý qalalaryndaǵy jedel medısınalyq járdem kórsetý stan­salaryna, al, qalǵan 10-y oblys­tyń jetim balalarǵa arnalǵan mek­tep-ınternat mekemelerine, onyń ishinde qulaqtary estimeıtin jáne nashar estıtin balalarǵa arnalǵan №1 arnaıy korreksııalyq mek­tepke, oblystyq arnaıy mektep-ınternatqa, oblys ortalyǵyndaǵy ata-analarynyń qamqorlyǵynsyz qalǵan jáne jetim balalarǵa arnalǵan №2 mektep-ınternatqa, Pavlodar aýdany Mıchýrın aýyly otbasylyq úlgidegi balalar úıine, Ybyraı Altynsarın atyndaǵy daryndy balalarǵa arnalǵan qazaq gımnazııa-ınternatyna, Ekibastuz qalasyndaǵy “Úmit” balalar úıine jáne Aqsý qalasy men Qashyr aýda­nyndaǵy balalar men jasós­pirimderge arnalǵan mektep jáne mek­tepke deıingi oqytý men tár­bıeleý túrindegi keshendi balalar úılerine berildi. Dárigerler men muǵalimderge jáne polısııa ókilderine kólik­ter­diń kiltin tabystap, olardy qýa­nysh­qa bólegen Prezıdentti budan keıin kishkentaı bóbekter kútip tur­dy. Osy jýyrda ǵana metal­lýrg­ter óz jumysshy-qyzmetkerlerine arnap jańa úı, olardyń balalary­na arnap jańa balabaqsha salǵyzyp berdi. “Qazaqstan Alıýmınııi” ak­sıonerlik qoǵamynyń jumysshy­la­ry men qyzmetkerleri úshin bu­dan artyq qandaı qýanysh bolsyn. Zaýyt basshylyǵy Elbasynyń bı­ylǵy Joldaýynda aıtylǵan mektep jasyna deıingi baldyrǵandardy oqytý men tárbıeleýdi qamtamasyz etýdi jaqsartýǵa baǵyttalǵan “Ba­lapan” arnaıy baǵdarlamasyn osylaı oryndaı bastady. О́ndiris ornyna jaqyn ornalasqan 240 oryndyq balabaqsha bir jyldyń ishinde salyndy. Ol tolyqtaı jańa zaman talaptaryna saı jabdyq­taldy. Shet tilderin úıretý jáne kompıýterlik saýattylyqqa baýlý, dene shynyqtyrý jáne mýzyka álemi zaldary sııaqty arnaıy kabınetter júıesi bar. Memleket basshysy búldir­shin­derge syılyqtar tartý etti. Olar da qaz-qatar tura qalyp, taqpaqtar oqı bastady. Munda keletin kish­kentaılar orys jáne qazaq tilde­rin­de oqyp-úırenip, tárbıe alady. Zaýyt basshysy Almas Ibragı­mov­tiń usynysymen tek zaýyt jumys­shylarynyń ǵana emes, osy aýdan kóleminde turatyn qala turǵyn­darynyń balalary úshin de bala­baq­sha esigi ashyq. Oblys ákimi Ba­qytjan Saǵyntaevtyń aıtýynsha, bıylǵy jyldyń sońyna qaraı óńirde 19 balabaqsha qaıtadan qal­pyna keltirilip, jalpy bilim beretin mektepter janynan 83 shaǵyn ortalyqtar ashylady. Taǵy bir qýanyshty jaǵdaı, osy balabaqsha janynan 125 páterli on qabatty turǵyn úı paıdalanýǵa berildi. Zaýyt basshylyǵy osymen ekinshi ret óz jumysshylary men qyzmetkerlerine jarqyraǵan, jańa páterler salyp berip otyr. Alyp korporasııa qabyldaǵan 2023 jylǵa deıingi áleýmettik baǵdarlamalar aıasynda balabaqshalar, turǵyn úıler, basqa da áleýmettik-turmys­tyq nysandar salý júıesi jos­parlanǵan. Bul maqsatqa korpora­sııa 45 mıllıon AQSh dollaryn jumsaýdy qarastyrǵan kórinedi. Balabaqshadan shyqqan soń Nursultan Ábishuly ózin kútip tur­ǵan osy jerdegi jańa úıden páter alǵan turǵyndarmen júzdesti. Mu­ǵalim Darııa Ábikenova men zaýyt qyzmetkeri Álibek Baıbazarov Elbasyna úlken alǵystaryn bil­dir­di. Kóńilderi jadyrańqy turǵyndar úıleriniń aldynan Memleket basshysyn “Saý bolyńyz, Sizge ár­qashan amandyq tileımiz, Siz bizdiń Prezıdentimizsiz”, dep rııasyz ystyq kóńilmen shyǵaryp saldy. Farıda BYQAI, PAVLODAR. Sýretterdi túsirgender S.BONDARENKO, B.OTARBAEV.