“Obyknovennyı fenomen” atty derekti fılmniń tusaýkeseri bolyp, elordalyqtarǵa onyń alǵash kórsetilimi usynyldy. “Asyl-mura” kınokompanııasy shyǵarǵan bul týyndy kópetnosty memleketimizdiń tynyshtyǵy men ulttar arasyndaǵy tatýlyqty baıandap qana qoımaı, elimizdiń kók týyn bıikte jelbiretken Olımpıada jeńimpazdary men júldegerleri, sportshylarymyz týraly áńgimeleıdi. Olardyń úlken jeńisterge jetken sátteri, sport jolyndaǵy jetistikteri jaıynda syr shertedi.
Grek-rım kúresinen KSRO-nyń jeti dúrkin chempıony, Olımpııa oıyndarynda birneshe ret júldeger bolǵan Dáýlet Turlyhanov jáne bokstan tanymal bapker Aleksandr Apachınskıı sııaqty qazaq sportynda eńbekteri sińgen tulǵalardyń arqasynda fılmniń negizgi ıdeıasy jolǵa salynǵan eken. Jáne de Valerıı Rıazansev, Ermahan Ybyraıymov, Iýrıı Melnıchenko, Baqtııar Artaev, Baqyt Sársekbaev, Aleksandr Parygın, Ilıa Ilın, Vasılıı Jırov, Álııa Júsipova, Olga Shıshıgına, taǵy da basqa sportshylarymyz fılmniń negizgi ózegin ashqan basty keıipkerleri kórinedi. Zamanǵa saı tehnologııalarmen túsirilgen fılm kóptegen telekompanııalardyń beıneqorlarymen tolyqtyrylǵan.
Fılmniń tusaýkeserine basty keıipkerler de arnaıy kelip qatysqan bolatyn. 50 mınýtqa sozylǵan derekti fılm shynymen de árbir jannyń júreginde maqtanysh sezimin týdyryp, sportshylardyń qýanyshty sátterin kórip tolqyǵannan tipti kózderine jas kelgen kórermender de boldy.
Fılmnen keıin basty keıipkerler men “Asyl-mura” kınokompanııasynyń músheleri ortaǵa shaqyryldy. Atalǵan kompanııa dırektory Jangeldi Moldahmetov fılm túsirý kezinde materıaldardyń kóp bolǵanyn, memlekettik arhıvtegi beıneqorlardy jáne Shveısarııadan arnaıy alynǵan Olımpııa oıyndarynyń beıne toptamasyn qoldanǵandaryn aıtty. Al sportshylar fılm týraly jyly lebizderin bildirdi.
Bı-Bolat SEITAQ, Eýrazııa ulttyq ýnıversıtetiniń stýdenti.