Elordada Qazaqstan Respýblıkasynyń “Qyzyl Aı” qoǵamynyń astanalyq qalalyq bólimshesi “EksonMobıl” kompanııasynyń qoldaýymen jáne Astana qalasynyń bilim basqarmasy, tótenshe jaǵdaılar departamenti men densaýlyq saqtaý basqarmasynyń kómegimen qala oqýshylaryn alǵashqy kómek kórsetý daǵdylaryna úıretýge arnalǵan “Mektepterge birinshi kómek!” jobasynyń bastapqy kezeńiniń nátıjelerin qorytyndalady.
Baspasóz málimdemesi boıynsha, jobaǵa 67 astanalyq mektep qatysyp, joba aıasynda alǵashqy kómek kórsetý daǵdylaryna 250-den astam muǵalimder men 6 700- ge jýyq joǵarǵy synyp oqýshylary praktıkalyq trenıngter túrinde oqytylyp, shaǵyn anyqtama kitapshalaryna ıe bolsa, 250 muǵalimge sertıfıkat berilgen.
Jobany júzege asyrý barysynda oqytý baǵdarlamasynyń tıimdiligi jóninde monıtorıng júrgizildi. Ol joǵarǵy synyp oqýshylary arasynda kómek kórsetý daǵdylary 40%-ǵa óskenin jáne ustazdar men oqýshylar arasynda úlken qyzyǵýshylyq týdyrǵanyn kórsetti.
Keleshekte yntymaqtastyqty odan ári jalǵastyrý maqsatynda memlekettik jáne jekemenshik mektepter men kolledjderdi qamtý, sonymen birge qosymsha jańa muǵalimder shoǵyryn daıyndaı otyryp, alǵashqy kómek kórsetýdi oqý oryndaryna engizý prosesin keńeıtý josparlanýda. Buǵan qosa, “Qyzyl Aı” men “EksonMobıl” jańa oqý jylynda osy jobany Atyraýda bastaýdy uıǵaryp otyr.
Balalardy qaýypsizdik negizderine oqytýdy qoldaı otyryp, biz qoǵamymyzdyń uzaq merzimdi jáne turaqty damýyna óz úlesimizdi qosýdamyz, – dedi “EksonMobıl” kompanııasynyń qoǵammen baılanys jónindegi keńesshisi Gúlnar Nuǵman.
Ásııa ORYNBAIQYZY, Qyzǵaldaq ZULPYHARQYZY.