PETROPAVL. 2 mamyr. Oblystyq tártiptik keńes músheleri kún tártibine usynylǵan máselelerdi talqylaı kelip, eki sheneýnikti qyzmetten bosatý jóninde sheshim aldy. Bul týraly Soltústik Qazaqstan oblystyq Memlekettik qyzmet isteri jáne sybaılas jemqorlyqqa qarsy departamenttiń baspasóz qyzmeti habarlady.
«Jas natýralıster stansasy» kommýnaldyq kásipornyna qatysty qaralǵan másele boıynsha kóptegen zańsyzdyqtardyń beti ashyldy. Atap aıtqanda, mekeme basshysy Ǵalym Temirbekov jaqyn týysynyń jumysta bolmaǵanyna qaramastan eńbek tabelin toltyrtyp, jalaqy tólettirgen. Jeke kásipkerlerdiń ıeligine garaj jalǵa berilgen. Qarjy salasynda da olqylyqtar oryn alǵan. Sybaılas jemqorlyqqa jol bergeni úshin ony laýazymnan shettetý týraly usynys biraýyzdan qoldaý tapty.
Sol sııaqty oblystyq jolaýshylar kóligi jáne avtomobıl joldary basqarmasy basshysynyń orynbasary oryndalmaǵan tapsyrmalarǵa jalǵan akt toltyryp, merdigerlik uıymǵa kópe kórineý artyqshylyqtar jasaǵany úshin qyzmetinen alastatylatyn boldy.
Tártiptik keńes otyrysynda Taıynsha aýdandyq oqý bólimi jetekshisiniń buryn sybaılas qylmysqa urynǵan tulǵany mektep dırektorlyǵyna taǵaıyndaǵan áreketine laıyqty baǵa berilip, qyzmetinen tómendetýge usynys jasaldy.
О́mir Esqalı.
Derek: Memlekettik qyzmet isteri jáne sybaılas jemqorlyqqa qarsy departamenttiń baspasóz qyzmeti.
Sýret: egemen.kz