Úkimet basshysy Oljas Bektenov pen Grýzııa Premer-mınıstri Iraklıı Kobahıdze «Qazaqstan temir joly» UK» AQ keńsesinde boldy. Onda grýzııalyq delegasııaǵa Qazaqstanda temirjol salasynda engizilip jatqan sıfrlyq sheshimder usynyldy.
QTJ keńsesin aralaý barysynda Grýzııa Premer-mınıstri «Biryńǵaı sıfrlyq tereze» qosymshasynyń jáne temirjol kóligindegi «aqyldy» júıeniń jumysymen tanysty. Bul ınnovasııalyq sheshimder rásimderdi jeńildetýge, júk tasymaldaý ýaqytyn qysqartýǵa jáne temirjol logıstıkasy salasyndaǵy ashyqtyqty qamtamasyz etýge baǵyttalǵan.
Búginde «Qazaqstan temir joly» UK» AQ men «Grýzııa temir joly» AQ arasynda eki eldiń tranzıttik aǵyndary men ekonomıkasyn jandandyrýǵa yqpal etetin seriktestik ornaǵan. Sonymen qatar Transkaspıı halyqaralyq kólik baǵytynyń mýltımodaldy qyzmetin damytý maqsatynda qurylǵan «Middle Corridor Multimodal Ltd.» birlesken kásiporny aıasynda yntymaqtastyq ornatyldy.
Taraptar porttar men termınaldardyń áleýetin asha otyryp, qolda bar kólik-logıstıkalyq múmkindikterdi paıdalaný arqyly júk tasymaly kólemin arttyrý jumysyn jandandyrý nıetin rastady.
2024 jyly Qazaqstannan Grýzııaǵa eksport 34%-ǵa, elimiz arqyly tranzıt 2023 jylmen salystyrǵanda 40%-ǵa ósti. 2024 jyly eki el arasyndaǵy tasymaldaý kólemi 4,7 mln tonna boldy. Jalpy, keıingi 4 jylda Qazaqstan – Grýzııa baǵyty boıynsha júk tasymaly 9 esege, THKB boıynsha 6 esege ósti.