Ispanııanyń La-Nýsııa qalasynda ótken halyqaralyq týrnırde elimizdiń boksshylary 6 altyn, 5 kúmis, 7 qola medaldy oljalady. Nurzat Ońǵarov (48 kg), Baǵlan Kenjebek (54 kg), Erhan Turdan (57 kg), Beıbarys Jeksen (60 kg), Almat Ábdýalı (63,5 kg), Darhan Dúısebaı (71 kg) teńdessiz dep tanylsa, Ernar Qarap (48 kg), Aqtilek Orynbasar (54 kg), Jandos Qydyrálıev (63,5 kg), Roksana Gasymova (48 kg), Baqyt Seıdish (70 kg) fınalda utyldy. Jasulan Tileýmbek (57 kg), Dýlat Bekbaýov (67 kg), Elnur Súıinbaı (71 kg), Dıas Moljigitov (75 kg), Dáýlet Tólemisov (80 kg), Danııal Saparbaı (+92 kg), Dıana Magaýıaeva (75 kg) qola medalǵa qol jetkizdi. Jalpykomandalyq esepte jerlesterimiz birinshi oryndy ıelendi.
Fýtboldan Albanııa men Serbııada jalaýy jelbireıtin «Eýro-2027» dodasynyń irikteý týrnıriniń kestesi jarııalandy. D tobynda óner kórsetetin elimizdiń jastar quramasy atalǵan jarystyń negizgi kezeńine joldama alý úshin myna komandalarmen kúsh synasady: Qazaqstan – Andorra (5 shilde, 2025 jyl), Qazaqstan –Anglııa (8 qyrkúıek, 2025), Andorra – Qazaqstan (9 qazan, 2025), Slovakııa – Qazaqstan (13 qarasha, 2025), Qazaqstan – Moldova (17 qarasha, 2025), Qazaqstan – Slovakııa (27 naýryz, 2026), Qazaqstan – Irlandııa (31 naýryz, 2026), Anglııa – Qazaqstan (25 qyrkúıek, 2026), Irlandııa – Qazaqstan (29 qyrkúıek, 2026), Moldova – Qazaqstan (6 qazan, 2025).
Elimizdiń kásipqoı boksshy Angelına Lýkas segiz kún ishinde eki ret rıngke kóterildi. 31 qantarda Reseı astanasynda nıgerııalyq Aıısat Orııomıdi utsa, ótken aptanyń aıaǵynda Túrkııada venesýelalyq Djoana Zýnıgadan basym tústi.
28 aqpan – 2 naýryz aralyǵynda dzıýdodan Tashkentte Grand-Slem týrnıriniń jalaýy jelbireıdi. О́zbekstannyń bas shaharynda Ǵalııa Tynbaeva, Dıana Býrkeeva (48 kg), Baqyt Qusaqbaeva (57 kg), Arýna Jankeldına (78 kg), Nazgúl Maratova (+78 kg), Eset Qýanov, Baqytjan Abdýrahmanov (73 kg), Aıdar Arapov (90 kg), Beıbit Mádeev (100 kg) tatamıge shyǵady.
8-16 naýryz aralyǵynda Serbııanyń Nısh qalasynda bokstan áıelder arasynda ótetin álem chempıonatynyń júlde qory belgilendi. Halyqaralyq boks federasııasy (IBA) bas júldeni oljalaǵan bylǵary qolǵap sheberine 100 myń AQSh dollaryn tabys etse, sol somanyń teń jartysyn fınalıster alady. Qola medaldy ıelengender 25 myń enshileıdi. Shırek fınalǵa shyqqandar 10 myń dollardy qaltaǵa basady.
Frıstaıl-mogýldan AQSh-tyń Dır-Vellıdesinde uıymdastyrylǵan Álem kýboginiń kezeńinde Pavel Kolmakov kúmis medaldy ıelendi. Ol tek japonııalyq Ikýma Horıshımadan qalyp qoıdy. Fransııalyq Bendjamın Kave úshinshi satyǵa taban tiredi. Paralleldi mogýldan ótken básekede P.Kolmakov qolaǵa qol jetkizdi. Bul joly da Horıshımaǵa teń keler eshkim tabylmady. Ekinshi oryndy kanadalyq Mıkael Kıngsberı ıelendi.