Y. Altynsarın atyndaǵy Ulttyq bilim akademııasy, Astana qalasynyń Bilim basqarmasy, Astana qalasy ákimdiginiń «Ádistemelik ortalyǵy» birlesip, Q. Muhamedhanov atyndaǵy №90 mektep- gımnazııasynda «Birtutas tárbıe: Ulttyq qundylyqtar men zamanaýı qoǵam úndestigi» taqyrybynda respýblıkalyq semınar ótkizdi, dep habarlaıdy Egemen.kz.
Semınardyń maqsaty – ulttyq jáne jalpyadamzattyq qundylyqtarǵa negizdelgen «Birtutas tárbıe» baǵdarlamasyn engizý arqyly tulǵanyń jan-jaqty damýyna jaǵdaı jasaý, qundylyqtardy oqytý jáne tárbıe prosesine kiriktirý boıynsha úzdik tájirıbelerdi taratý.
Shara barysynda №90 mekteptiń ulttyq dástúrdi jańǵyrtýǵa baılanysty zamanmen úılesim tapqan salt-dástúr úlgileri, mektep oqýshylary, muǵalimderi jasaǵan óner týyndylary, bilim berý júıesine ıkemdelgen ulttyq oıyndar, tanymdyq sharalar uıymdastyryldy.
Semınarǵa QR Oqý-aǵartý mınıstrliginiń, Y. Altynsarın atyndaǵy Ulttyq bilim akademııasynyń ókilderi, Oblystardyń, Astana, Almaty jáne Shymkent qalalarynyń Ádistemelik ortalyqtary basshylarynyń orynbasarlary, ádiskerleri, memlekettik jáne jeke menshik bilim berý uıymdarynyń basshylary, basshy orynbasarlary qatysty.
Keleli keńeste kirispe sóz sóılegen Astana qalasy ákimdiginiń «Ádistemelik ortalyǵy» basshysy Syndar Daýeshova «Birtutas tárbıe» baǵdarlamasyn júzege asyrýdaǵy elordalyq pedagogterdiń ozyq tájirıbelerin óńirlerden kelgen áriptesterine pash etip, ortaq maqsata jumyla eńbek etse ǵana nátıje bolatynyna toqtalyp, búgingi sharanyń basty mindeti osy ekendigine nazar aýdardy.
Y.Altynsarın atyndaǵy Ulttyq bilim akademııasynyń vıse-prezıdenti Anar Táńirbergenova «Birtutas tárbıe baǵdarlamasy: bala tárbıesine ne beredi?» taqyrybynda jan-jaqty saralaý jasap, ultyq ıdeıa, memleketshildik, otanshyldyq, táýelsizdik taqyryptaryna keńinen toqtalyp, bilim berý uıymdary oqýshylardyń boıyna darytýy tıis qundylyqtardyń mańyzdylyǵyn aıqyndap berdi. Baǵdarlama engizilgeli beri atqarylǵan jumystardyń nátıjesine naqty derekter keltirdi. Barlyq bilim berý uıymdary atalǵan baǵdarlamamen tolyq tanysyp, teorııasyn meńgerip alǵandyqtan, aldaǵy ýaqytta is júzinde ár óńirde respýblıkalyq tájirıbe almasý sharalary ótetinin tilge tıek etti.
Semınar jumysy aıasynda pedagogıkalyq hakaton, «Ulttyq qasıetter men qoǵamdyq órkenıet úılesimi», «Qundylyqpen birge: qıyndyq, kózqaras, ózgeris», «Oqýshylardyń jan-jaqty damýy: tárbıe men bilimniń úılesimdiligi», «Qundylyqtardy oqytý prosesine kiriktirý: tájirıbe jáne tásilder», «Ata-ana jáne bala: úılesimdi qarym-qatynasqa qol jetkizý joldary», «Tárbıe men oqytýda qundylyqtar júıesin qalyptastyrýdyń úzdik tájirıbeleri» taqyryptarynda tájirıbelik alańdar jumysy uıymdastyryldy.
Sharaǵa qatysýshylar elordalyq bilim berý uıymdarynda «Birtutas tárbıe» baǵdarlamasyn júzege asyrý barysynda atqarylyp jatqan jumystardyń jańashyldyǵyna toqtalyp, úlgi alatyn tustary mol ekenin alǵa tartty.
Sharanyń ekinshi kezeńinde aımaqtardan kelgen ustazdar, №8,87,37,90,91, 76 bilim berý uıymdarynyń tájirıbelerin kórip, ózara pikir almasty.