Kıikterdiń jappaı qyrylýynan qaýiptenip qalǵan jurtqa baǵymdaǵy maldyń da shetineýiniń ushyrasýy – alańdatarlyq oqıǵa. Mundaı jaǵdaı Ulytaý aýdanyndaǵy Boztumsyq aýylynda oryn aldy. Alaıda, áleýmettik jelilerde habarlanǵandaı, munda birden 100-den astam mal basy emes, 21 iri qara túri, atap aıtqanda, 19 buzaý, 2 qashar tuıaq seripken eken. Ázirge basqalary ólim-jitimnen aman.
Keshe aýdandyq veterınarııa bóliminen bilgenimizdeı shetinegen maldardan alynyp, tekseriske jiberilgen úlgini Aýyl sharýashylyǵy mınıstrligi veterınarlyq baqylaý jáne qadaǵalaý komıtetiniń «Veterınarııa boıynsha ulttyq referenttik ortalyǵy» zerttegen. Nátıjesinde lısterıoz pen pasterellez aýrýlary ekeni anyqtalypty. Osyǵan baılanysty atalǵan komıtettiń Qaraǵandydaǵy epızotııaǵa qarsy otrıady mamandary búginde Qarakeńgir aýyldyq okrýgi aýmaǵyndaǵy mal qoralaryna dezınfeksııa jumystaryn jasap, aýrýdyń taralmaýy úshin aldyn alý sharalaryn júrgizýde. Osyndaı istermen qatar, aýdandyq ákimdiktiń qaýlysymen maldy daǵdyly jaıylym aýmaǵynan asyrmaı baǵýǵa, et, sút ónimderin syrt jerlerge shyǵarmaýǵa shekteý qoıyldy.
Mundaı tosyn jaǵdaı bul aýylda kópten beri ushyraspapty.Soǵan tap bolý jergilikti turǵyndardyń qoldaryndaǵy túlik túrleriniń veterınarlyq kútimine degen jaýapkershiligin kúsheıtýge den qoıdyryp otyr.
Aıqyn NESIPBAI,
«Egemen Qazaqstan».
Qaraǵandy oblysy,
Ulytaý aýdany.