Elimizdiń mádenıeti men ónerine erekshe úles qosqan dıktor, Qazaqstannyń eńbek sińirgen ártisi Saýyq Jaqanovanyń 80 jasqa tolǵan mereıtoıyna oraı Almatydaǵy Ulttyq kitaphanada «Sahara sandýǵashy» atty kitaptyń tanystyrylymy ótti.
Dara daýsymen qazaqtyń dalasyn terbegen kórkemsóz óneriniń ustasy, esimi elge belgili dıktordyń mereıtoıy qarsańynda jaryq kórip otyrǵan «Sahara sandýǵashy» atty irgeli jınaq Saýyq Másiǵutqyzynyń ómir joly, Qazaq radıosyndaǵy qyzmeti, ustazdyq eńbegi týraly syr shertedi. Syńǵyrlaǵan jaǵymdy daýsy tyńdarmanynyń qulaǵynda da, júreginde de saqtaýly turǵan Saýyq Másiǵutqyzy radıo habarlarǵa ózgeshe óń berip, qazaq radıosynyń tarıhynda óshpes iz qaldyryp, onyń damýy men órkendeýi úshin laıyqty eńbek sińirdi. Ol týraly án padıshasy Roza Baǵlanova: «Saýyq Jaqanovany jaqsy kóremin. Maǵan onyń sózdi buzbaı mánine keltirip aıtatyny, jaqsylyq nemese jamanshylyq bolyp jatsa, ony da adamnyń kókeıine jeterlikteı zerdelep, áserli jetkizetini unaıdy. Ári aıtyp turǵan taqyrybyna saı mazmunyn dál beredi. Men onyń talantyn joǵary baǵalaımyn», degen eken.
Atalǵan jınaq belgili rýhanııat janashyry, baspager Raqymǵalı Qul-Muhammedtiń tikeleı qoldaýymen «Atamura» baspasynan jaryq kórip otyr. Kitaptyń qurastyrýshylary – Aqparat salasynyń úzdigi, belgili jýrnalıst Tańsulý Aldabergenqyzy men Jýrnalıster odaǵynyń múshesi, radıojýrnalıst Jazıra Amantaıqyzy.
«Qazaq dıktorlarynyń atasy Ánýarbek Baıjanbaev Saýyq Jaqanovany «efırdiń Aqbaıany» ataǵan. Biraq apaı «Aldymda daýylpaz dıktor Ánýarbek aǵalarym bar. Ol kisilerden buryn qalaı kitap shyǵaramyn?» dep estigen bette at-tonyn ala qashty. Dese de, bar sanaly ǵumyryn radıo qyzmetine arnaǵan, birneshe býyn urpaqty meıirban daýsymen oıatyp, tárbıelegen, ulttyń únindeı bolǵan altyn daýys ıesiniń ǵıbratty ǵumyrynan syr shertetin bir kitapty oqyrmanǵa tartý etý kerek degen oı kókeıimnen ketpedi. Bul kitapta Dýlat Isabekov, Ilııa Jaqanov, Asanáli Áshimov, Dúkenbaı Dosjan, Qasymhan Ersarın, Kópen Ámirbek, Namazaly Omashev, Nazarbek Qanapııauly, Amanjol Eńsebaev, Baýyrjan Omaruly, Ámirhan Meńdeke syndy zııaly qaýymnyń tolǵamdy, jaqsy dúnıesi jınaqtalǵan. «Sahara sandýǵashyn» sol úshin oqý kerek», deıdi qurastyrýshy Tańsulý Aldabergenqyzy.
296 betten turatyn kitapty «Atamura» baspasy oqyrmanǵa 1000 danamen usynyp otyr. Erekshe bezendirilgen eńbektiń sońǵy betterinde dıktor bolǵysy keletinderge arnalǵan keńester men arnaıy jattyǵý úlgisi berilgen. Sondaı-aq kitap sońynda eki QR tur. Onda Saýyq Jaqanovanyń oqyǵan óleńderi usynylǵan. Qazaq radıosynyń «Altyn qorynda» Saýyq Jaqanovanyń oqýynda 500-den astam ádebı-mádenı, derekti, kórkem shyǵarma men 100-den astam ertegi jazylyp, saqtalǵan.
Kitaphanadaǵy rýhanı keshke ult zııalylary Nurlan Orazalın, Faýzııa Orazbaeva, Hanbıbi Esenqaraqyzy, BAQ salasynyń maıtalmany Nurjan Jalaýqyzy, «Atamura» korporasııasynyń prezıdenti Raqymǵalı Qul-Muhammed, belgili qalamgerler, Saýyq Jaqanovanyń týystary, dostary, shákirtteri men zamandastary qatysty.
ALMATY