ASTANA. 3 mamyr. Túrikmenstan prezıdenti Gýrbangýly Berdymýhamedovtiń nemeresi Kerımkýlı sońǵy kúnderi túrikmen televıdenıesiniń naǵyz qaharmanyna aınalyp tur. Buǵan bala Berdymýhamedovtiń at báıgesine qatysqany sebep bolǵan. Bul týraly «Azatlyk» radıosy habarlady.
Oqıǵa 26 sáýirde Ashhabadtyń halyqaralyq at sporty ıppodromynda Túrikmen sáıgúligi kúni qurmetine arnalǵan at báıgesinen keıin órbigen. Osy kúngi túrikmen televıdenıesi habarlarynyń naǵyz myq shegesi prezıdent Gýrbangýlı Berdymýhamedovtiń 12 jastaǵy nemeresi Kerımkýlı Berdymýhamedovtiń sol jarysqa qatysqany bolǵan. Jas shabandoz osy báıgede Dovamat (qazaqsha – Jalǵas) degen aıǵyrmen jarys jolyna shyǵady. Al onyń atbegi retinde prezıdenttiń ózi qyzmet etedi.
Aıta ketetin jaıt, 2014 jyly Gýrbangýly Berdymýhamedov «Túrikmenstannyń sheber atbegi» degen ataq alǵan edi. Oǵan bul shen «túrikmen attarynyń dańqyn qaıta jańǵyrtýda, halqymyzdyń atbegilik óneri bedelin kóterý men ony búkil álemge tanytýda, at sporty men jylqy sharýashylyǵy salasyn, bul saladaǵy keń aýqymdy halyqaralyq yntymaqtastyqty damytýda sińirgen asa kórnekti eńbegi, sondaı-aq joǵary shabandozdyq sheberligi úshin» berilgen bolatyn.
Túrikmenstan memlekettik aqparat agenttiginiń habaryna qaraǵanda, «eldiń túrli vedomstvolary taǵaıyndaǵan júldeler men Túrikmenstan prezıdentiniń bas júldesi úshin uıymdastyrylǵan merekelik báıge eń úzdik ahalteke attarynyń jáne myqty shabandozdardyń qatysýymen jeti túrli qashyqtyq boıynsha» ótkizilgen. Aqparda sondaı-aq jeti báıgeniń barlyq jeńimpazdarynyń esimderi de habarlanady. Biraq agenttik reportajynda prezıdent nemeresiniń jeńisi týraly bir aýyz sóz joq.
Soǵan qaramastan, telearnalar báıgeniń sońyndaǵy saltanatty rásimde bas báıgeniń Kerımkýlı Berdymýhamedovke tapsyrylǵany týraly jarysa habarlap, buǵan telereportajdarda aıryqsha mán berip jatty. «Shamasy, prezıdent nemeresi báıgege konkýrstan tys qatyssa kerek», dep málimdeıdi «Azatlyk» radıosy óz habarynda.
Osy «oqıǵaǵa» túsindirme bergen «Alternatıvnye novostı Týrkmenıstana» bylaı dep jazdy: «Altyn Asyr» telearnasynyń reportajyn kórgenderdiń kópshiliginiń kóńilinde jaısyz nárse qalyp qoıdy. Telekórermenderge bul trıbýnada turǵan kórermenderdiń adal da ádil saıys kórmek bolǵan nıetterin aıaqqa basyp, ózderin aldap ketkendeı áser qaldyrdy».
Budan bir jyl buryn tap osyndaı Túrikmen sáıgúligi kúni qurmetine ótken at báıgesinde kómbege birinshi bolyp kele jatqan prezıdent Berdymýhamedov erdiń ústinen ushyp túsip edi.
Qurysh Nurymbet.
Derek, sýret: Azatlyk radıosy.