Qazir mektepter men arnaıy oqý oryndarynda jastardyń patrıottyq sezimin tárbıeleý maqsatynda kóptegen uıym men úıirme qyzmet atqaratyny belgili. Jemisi de, jeńisi de kóńilge jylylyq uıalatady. Jaqynda Kókpekti aýdanynyń «Jas sarbaz» synybynyń oqýshylary keıýananyń ómirin saqtap qaldy.
Aýdan ortalyǵyndaǵy mekteptiń oqýshylary «Úlkenge qurmet» aksııasynyń aıasynda qarııalardyń aýlalaryn qardan tazartyp, úı jumysyna kómektesip júrip oqys oqıǵanyń qaharmanyna aınalyp shyǵa kelgen. Kezekti márte qolǵabys etýge shyqqan Rasýl Baqtybekov, Ertaı Aıypqazy, Erasyl Dáýithan jalǵyzbasty aýyl turǵyny Felısada Arabej ájeıdiń úıine arnaıy bas suǵyp, bir jamandyqty sezgen jasósipirimder birden iske kirisedi.
«Ájeıdiń úıine ofıser-tárbıeshimiz Talǵat Toqtarulynyń jetekshiligimen bardyq. Biz kelgende úıdiń ishki jaryǵy qosylyp turdy. Esikti qaǵyp, qońyraý soǵyp edik, jaýap bolmady. Bul bizge kúmán týǵyzdy. Kórshilerden ájeıdi sońǵy ret qashan kórgenin suradyq. Olardan qarııany eki kúnnen beri syrtqa shyqpaǵanyn estı sala shuǵyl áreket jasaýǵa sheshim qabyldadyq», deıdi oqýshylardyń biri Ertaı Aıypqazy.
Kórshilermen birge terezeni syndyryp, ishke engen oqýshylar ájeıdiń es-tússiz jerde jatqanyn kóredi. Birden jedel járdem shaqyryp, dárigerler qajetti em-domyn jasaǵan. Osylaısha, oqýshylar men tárbıeshilerdiń qyraǵylyǵy arqasynda 85 jastaǵy qarııa ólim aýzynan aman qaldy. Qazir Felısada Arabej emhanadan shyqqan, jaǵdaıy birqalypty.
Aýdan ákimdigi Kókpekti orta mektebiniń «Jas sarbaz» synybynyń oqýshylary men jetekshisine alǵys bildirip, olardyń erligi men adamgershiliginiń kópke úlgi ekenin atap ótti. Búginde jas jetkinshekter oblystyq eriktiler forýmyna shaqyrtý alyp, eldiń qoshemetine bólenip júr.
Abaı oblysy