Jalań judyryqpen kúsh synasýdan Almatyda ótken «Nomad Fighting Championship» 12 týrnırinde Juman Jumabekov jarqyn jeńiske qol jetkizip, jankúıerlerin qýantty.
Aralas jekpe-jek pen kásipqoı boksty qatar alyp júrgen qazaqtyń qaısar uly Rasýl Myrzaevpen aıqasty. Bul esim jankúıerlerge jaqsy tanys. «Qara jolbarys» degen búrkenshik esimmen tanylǵan Daǵystannyń týmasy jaýyngerlik sambodan álem chempıony, pankratıonnan Álem kýboginiń ıegeri, jekpe-jektiń san alýan túrinen kóptegen dúbirli dodanyń jeńimpazy. 2009–2016 jyldar aralyǵynda 17 márte oktagonǵa shyqqan R.Mırzaev barlyq básekede jeńiske jetti. Qarsylasynyń denin aıqyn basymdyqpen utty.
Rasýl 2013, 2014 jyldary elimizge kelip, Erjan Estanovpen kúsh synasty. Bul kezdesýdiń ekeýinde de daǵystandyq jeńiske jetti. 2020 jyldyń kókteminde Almaty tórinde jalaýy jelbiregen ASA týrnırinde Arman Ospanov («Suńqar») ony jerge jyǵyp alyp, aýyr soqqylardyń astyna aldy. «Qara jolbarystyń» sharasyz kúıin kórgen tóreshi dereý jekpe-jekti toqtatty. Keıinnen sol básekede Rasýldyń jaǵy synǵany belgili boldy.
Arada bes jyl ótkennen keıin Mırzaev Alataý baýraıyna qaıta at basyn burdy. «Naıza» promoýsheni uıymdastyrǵan jarysta J.Jumabekovpen judyryqtasty. Qandasymyz onyń erkin kósilýine esh múmkindik bergen joq. Ekinshi raýndta Jumannyń joıqyn soqqysy qarsylasyna dál tıdi, Rasýl táltirektep qaldy. Sol mezette oǵan taǵy birneshe soqqy jumsap úlgerdi. Mırzaevtyń qorǵanýǵa shamasy kelmedi. Daǵystan ókiliniń áli de es jııa almaı turǵanyn baıqaǵan tóreshi araǵa tústi. Osylaısha, Almatydaǵy aıqas J.Jumabekovtiń aıqyn jeńisimen aıaqtaldy.