QMA Mańǵystaý oblysynyń departamenti 2022-2023 jyldary kompıýterlik zal atyn jamylyp zańsyz qumar oıyn bıznesin uıymdastyrǵan qylmystyq toptyń áreketin toqtatty, dep habarlaıdy Egemen.kz.
Vedomstvonyń habarlaýynsha, qatysýshylardan aqshalaı stavkalar bank aýdarymdary arqyly qabyldanyp, keıin olar arnaıy platformada tirkelip, oıyndarǵa qatysý úshin logın, parol jáne silteme berilip otyrǵan. Nátıjesinde qylmystyq toptyń jalpy tabysy 77 mln teńgeden asqan.
«Qarjylyq tergeý barysynda kúdiktiler zańsyz jolmen tabylǵan qarajatqa 36 mln teńgege eki avtokólik – «Toyota Land Cruiser» jáne «Mersedes-Benz 320» satyp alǵany anyqtaldy. Sot úkimimen olar QR QK 307-baby 2-bóligi 2-tarmaǵy (zańsyz qumar oıyn bıznesin uıymdastyrý) jáne 262-baby 1-bóligi, 2-bóligi (uıymdasqan qylmystyq top qurý, basqarý jáne olarǵa qatysý) boıynsha kináli dep tanylyp, 5-ten 8 jylǵa deıin bas bostandyǵynan aıyryldy», delingen habarlamada.
Qylmystyq jolmen alynǵan avtokólikter memleket paıdasyna tárkilengen.