ABAI TÁJIK TILINDE SО́ILEDI

Hakim Abaıdyń “Qara sózde­rimen” endi tájik baýyrlarymyz da tanysatyn boldy. Jaqynda “Pan­dnoma” degen atpen jaryq kórgen kitaptyń tusaýkeseri Dýshanbe qala­syndaǵy Jýrnalıster Odaǵy úıinde ótip, oǵan tájik eliniń zııaly qaýymy, qoǵam qaıratkerleri men BAQ ókilderi qatysty. Kitapty tájik tiline aýdarý jáne bastyryp shyǵarý – bul Tájikstandaǵy Qazaq­stan elshiligi men Tájikstan Jýr­na­lıster Odaǵynyń jáne “Tájikstan-Qazaqstan” dostyq qoǵamynyń bir­lesip uıymdastyrǵan jobasy. Jınaqty oqyrman qaýymǵa ta­nystyra kele Tájikstandaǵy Qazaq­stannyń tótenshe jáne ókiletti el­shisi Ábýtálip Ahmetov Abaıdyń shyǵarmashylyq murasy shet tilderge birneshe márte aýdarylǵanyn atap óte kele kitaptyń Tájikstan joǵar­ǵy oqý oryndary men ulttyq kitap­hanasyna syıǵa tartylatynyn da jetkizdi. Al osy jınaqtyń jaryqqa shyǵýy Tájikstannyń Mádenıet mı­nıstri Abdýgaffar Abdýjabbarov­tyń pikirinshe, eki eldiń ózara dos­tyq baılanysyn, yntymaq­tastyǵyn burynǵydan da jaqyndata túspek. Tusaýkeserde sóz alǵan aýdar­ma­shy, pýblısıst, abaıtanýshy Fat­hýllo Azızov bul kitaptyń arqaýy – adamgershilik taqyryby ekenin atap ótip, jańa kitaptyń ishinen biraz úzindiler oqydy. Ol osy qara sózderdi aýdarý barysynda birqatar úzindilerin jergilikti basylymdarǵa jarııalaǵan eken. Tájik baýyrlar birden qyzyǵýshylyq tanytypty. Sondaı-aq Tájikstan-Reseı ýnı­versıtetiniń professory Ábdýsattar Nuralıev óz sózinde Abaıdyń shy­ǵar­malarynyń tájiktiń klassıkalyq shyǵarmalaryna jaqyndyǵyn tilge tıek etti. Raýshan NUǴMANBEKOVA.