Elimizde turmystyq qatty qaldyqtardy (TQQ) jınaýǵa, suryptaýǵa jáne kómýge arnalǵan tarıfter arnaıy kásiporyndardyń shyǵyndaryn jappaıdy. Bul týraly Úkimet otyrysynda ekologııa jáne tabıǵı resýrstar mınıstri Erlan Nysanbaev málimdedi, dep jazady Egemen.kz.
Respýblıkada jyl saıyn 4,5 mln tonnadan astam qaldyq túziledi. Byltyr qoqysty qaıta óńdeý deńgeıi shamamen 26%-dy qurap, josparlanǵan 30%-ǵa jetpegen. Atalǵan máseleni sheshý úshin mınıstr memlekettik-jekeshelik áriptestik (MJÁ) tetigin engizýdi usyndy. Osy tetik sheńberinde TQQ-ǵa shekti, ekonomıkalyq negizdelgen tarıfti bekitý, sondaı-aq ony ákimdikter deńgeıinde belgileý jónindegi quziretti aıqyndaýdy ortaǵa saldy. Ol boıynsha qazirgi jáne usynylatyn tarıfter arasyndaǵy aıyrmashylyqty ýtıl alymdary esebinen jabý josparlanyp otyr. Buǵan qosa, Memleket basshysynyń iri qalalarda qoqys óńdeý zaýyttaryn salý jónindegi tapsyrmasyn iske asyrý sheńberinde ýtıl alymdary esebinen jeńildikpen qarjylandyrý tetigi bekitilgen. Bul ýtıl tólemi esebinen qarjylandyrylatyn, tólemder boıynsha eki jylǵa deıingi demalysy bar jyldyq 3%-dan 15 jylǵa deıingi qaryzdardy qamtıdy. Búgingi tańda Mınıstrlik ákimdikter usynǵan quny shamamen 317 mlrd teńge bolatyn 67 jobany maquldady, onyń 43-i qaldyqtardy qaıta óńdeýge baǵyttalǵan. Mınıstrlik júrgizgen taldaý nátıjesinde óńirlerde jobalardy iske asyrý jáne qaıtalama shıkizatty barynsha óndirý kezinde turmystyq qatty qaldyqtardy qaıta óńdeý jónindegi qýattardy ulǵaıtý úshin aıtarlyqtaı áleýet bar ekeni anyqtalǵan.