QAShQYNDAR QURYQTALDY

Qylmys Keshe IIM-de aǵymdaǵy jyldyń 22 maýsymynda Mańǵystaý oblysyndaǵy qatań rejimdegi túzeý mekemesinen 21 adamnan turatyn bir top qarýlanǵan, aýyr qylmys jasaǵany úshin sottalǵandardyń qashyp ketý oqıǵasyna baılanysty brıfıng bolyp ótti. Onda baspasóz hatshysy Qýanyshbek Jumanov sottalǵandardyń tolyq ustalǵandyǵy týraly habarlady. Oqıǵa boıynsha az-kem túsinikteme bersek. Sottalǵandar tańǵy saǵat 5 shamasynda kishi transformator stansasyn isten shyǵaryp, aldyn ala daıyndap alǵan bóget-tosqaýyldardy kesetin quraldardy paıdalana otyryp, tyıym salynǵan aımaqty buzyp ótken. Qashý barysynda kúzette turǵan saqshyǵa baǵyttap birneshe ret oq atqan. Alaıda ishki áskerdiń áskerı qyzmetshisi óziniń jaralan­ǵanyna qaramastan, qashqyndarǵa  qarý qoldanyp, onyń nátıjesinde úsh sottalǵan oqıǵa ornynda kóz jumǵan. Qashqyn­dardyń izine túsken qaraýyl toby sottalǵan­dardyń birin qatań rejimdegi túzeý mekemesinen 200 metr jerde jaralaǵan, ol alǵan jaraqatynan keıin medısınalyq mekemede qaıtys boldy. Sottalǵan­dardyń bir bóligi Aqtaý qalasynan 13 shaqy­rym jerde salynyp jatqan ǵı­maratta jasyrynǵan. IIM ishki áskerleriniń izge túsý toby men jıyntyq jasaǵy ǵımaratty qorshaýǵa alyp, qylmyskerlermen kelissózder júrgizgen. Odan esh nátıje shyqpaǵan soń sol jerge jedel túrde jetken oblystyq IID “Arlan” arnaıy maqsattaǵy bóli­nisiniń ustaý toby olarǵa shabýyl jasap, qarýly qarsylyq kórsetý nátıjesinde 2 sottalǵan opat bolyp, taǵy bireýi aýyr jara­lanyp, sonyń saldarynan qaıtys boldy. Osylaısha oqıǵa oryn alǵan kúnniń keshinde 7 sottalǵan qaıtys bolyp, taǵy bireýi tirideı qolǵa tústi. Oqıǵa ornynan atys qarýy, jarǵysh paketter men jarylǵysh zattar salynǵan sómke, metall jańqasymen toltyrylyp qoldan jasalǵan jarǵysh qurylǵy, janatyn qosyn­dysy bar 16 bótelke, sondaı-aq 400 myń teńgege jýyq aqsha tárkilendi. Tótenshe oqıǵa oryn alǵan kúnderi Aqtaý qalasynyń ishki ister organdary dereý dabyl boıynsha kóterilip, vokzal, áýejaı men sottalǵandardyń barýy yqtımal baǵyttar jabylyp, qyzmet kúsheı­tilgen rejimge aýystyryldy. Son­daı-aq kórshiles Qyzylorda, Atyraý, Batys Qazaqstan oblys­tarynyń ishki ister organdarynyń jeke quramdary dabyl boıynsha kóterilip, olar da kúsheıtilgen jumys kestesine ótti. Oqıǵaǵa oraı Ishki ister mınıstri Serik Baı­maǵan­betov arnaıy jedel tergeý tobyn qurdy. Krımınaldyq polı­sııa komıtetiniń tóraǵasy S. Qusetov basqarǵan IIM-niń birqatar qyzmetkerleri Mańǵystaý obly­syna attandyryldy. Sondaı-aq IIM-niń “Suńqar” jáne “Búrkit” arnaıy maqsattaǵy bólinisteri jiberilip, qashqyndardy ustaý maqsatyndaǵy jumysqa jumyl­dyryldy. Mekemeden qashyp shyqqan sottalǵandardy izdeý jáne ustaý jónindegi is-sharalar Mem­leket basshysynyń tikeleı, jeke baqylaýynda boldy. Jedel-izdestirý is-sharalary­nyń nátıjesinde Aqtaý qalasynan 170 shaqyrym qashyqtyqtaǵy Qyzylsaı shatqalynan sottal­ǵandar men olardyń qashyp shy­ǵýyna kómektesken adamdar tabyl­dy. 27 maýsymǵa qaraǵan túni ishki ister organdary arnaıy bólinis­teriniń kúshimen osy adamdardy ustaý boıynsha arnaıy jaýynger­lik operasııa júrgizildi. Ustaý kezinde ishki ister organdaryna qarýly qarsylyq kórsetilgen. Operasııa nátıjesinde sottalǵan 5 adam ustalyp, 8 qylmysker qaıtys bolǵan. Sondaı-aq qarýly qaqty­ǵysta sottalǵandardyń qashýyna kómektesken 4 adam qaza tapqan. Polısııa qyzmetkerleri anyq­taǵan bastapqy derekter boıynsha, sottalǵandar qashýǵa jarty jyl boıy daıyndalyp, josparlaǵan kórinedi. Oqıǵa ornynan atys qarýy, uıaly baılanys quraldary, azyq-túlik, kompas jáne 3,5 mln. teńgeden astam aqsha alyndy. Qyl­myskerlerdi ustaý jáne olardy zalalsyzdandyrý boıynsha opera­sııalardy ótkizý kezinde ishki ister organdary men ishki áskerlerdiń 3 qyzmetkeri jaraqat alǵan. Aıdyń-kúnniń amanynda búkil eldi dabyr­latyp, eldiń tynyshtyǵyn buzǵan oqıǵa boıynsha bas bostandyǵyn aıyrý ornynan qashý jáne áskerı qyzmetshiniń ómirine qastandyq jasaý faktilerine baılanysty, túzeý mekemesiniń laýazymdy tulǵalaryna qatysty QK-niń 316- baby (salaqtyq) boıynsha 3 qyl­mystyq is qozǵaldy. Qylmys jasa­dy degen kúdikpen qatań rejimdegi mekemeniń bastyǵy, jedel bólimniń bastyǵy jáne mekeme bastyǵynyń kezekshi-kómekshisi ustalyp, olar ýaqytsha ustaý ızolıatoryna qamaýǵa alyndy. Qazirgi ýaqytta tergeý amaldary júrgizilý ústinde. Venera TÚGELBAI. ASA IRI KО́LEMDEGI KONTRABANDA ANYQTALDY Astana qalasy boıynsha keden­dik baqylaý departamenti kontra­bandaǵa qarsy kúres basqarmasy­nyń qyzmetkerleri Astana qalasy halyq­aralyq áýejaıynyń ushý zalynda A. A. degen Reseı azamatyn ustady. Bul azamat Qazaqstan aýmaǵyna Túrkimenstannan, ıaǵnı Almaty qalasynyń halyqaralyq áýejaıyna ushyp kelgende 145 000 AQSh dol­lary kóleminde kedendik deklarasııa toltyrǵan. Al Qazaq­stan aýmaǵynan ushyp shyǵarda 120 000 AQSh dol­lary kedendik dek­larasııasyn toltyrǵan. Biraq kedenshilerdiń qy­raǵy tekserisi arqasynda jo­ǵaryda atalǵan aza­mat­tan zańsyz jasy­rylǵan 117 610 AQSh dollary, 40 000 eýro, 40 reseı rýbli, 22 qyrǵyz somy bar ekeni anyqtalyp, alyndy. Sonda “Qazaqstan Respýblı­kasy Halyq banki” MM-niń orta­lyq fılıalynyń málimet­terine sáıkes, 1 AQSh dollary – 147, 28 teńge, 1 eýro – 179,40 teńge, 1 reseı rýbli – 4,69 teńge, 1 qyrǵyz somy 3,22 teńge bolsa, reseılikten alynǵan shetel valıýtasynyń quny 24 497 859,44 teńgeni qurady. Demek, bul asa iri kólemdegi kontrabanda bolyp tabylady. Osy derekke qatysty A.A. degen azamatqa qatysty QR QK-niń 209-baby (ekonomıkalyq kontrabanda) boıynsha qylmystyq is qozǵaldy, dep habarlady Astana qalasy boıynsha kedendik baqylaý departamentiniń baspasóz qyzmeti.