Qasym-Jomart Toqaev mártebeli meımanǵa iltıpat bildirip, onyń sapary Qazaqstan-Slovenııa seriktestigin tereńdetýge septigin tıgizip, keń múmkindikterge jol ashatynyn aıtty, dep habarlaıdy Egemen.kz Aqordanyń baspasóz qyzmetine silteme jasap.
Prezıdenttiń aıtýynsha, Slovenııanyń Qazaqstan ekonomıkasyna salǵan tikeleı ınvestısııasynyń kólemi 200 mıllıon dollarǵa jýyqtady. Elimizdegi farmasevtıka, mashına jasaý, telekommýnıkasııa jáne jańartylatyn energııa kózderi salalarda Slovenııa kapıtalynyń úlesi bar 19 kompanııa kásibin tabysty júrgizip keledi. Budan bólek, Qazaqstan men Slovenııanyń kólik-logıstıka, sıfrlandyrý jáne ınnovasııa, densaýlyq saqtaý, týrızm baǵyttarynda ózara seriktestikti arttyrýǵa áleýeti zor.
Slovenııa Prezıdenti ózine jáne delegasııasyna qonaqjaılyq tanytqany úshin Qasym-Jomart Toqaevqa shynaıy rızashylyǵyn jetkizdi.
«Dıplomatııalyq qarym-qatynas ornaǵan 33 jyl ishinde eki el arasynda birde bir sheshilmegen másele bolǵan emes. Munyń ekonomıkalyq yntymaqtastyqty keńeıtýge, órkendetýge mol múmkindik beretinin durys atap óttińiz. Sondyqtan ózimmen birge bıznes ókilderiniń úlken delegasııasyn alyp keldim. Olar qazaqstandyq áriptestermen birge seriktestikti ilgeriletýge qatysty baǵyttardy talqylap jatyr. Ekonomıkalyq yqpaldastyǵymyz artyp keledi. Degenmen budan da zor jetistikterge jetemiz dep oılaımyn. Prezıdentter men saıasatkerler arasyndaǵy baılanystar árqashan bolashaqqa baǵdarlanady. О́ıtkeni saıasatkerler bıznestiń kókjıegin keńeıtedi», dedi Natasha Pırs-Mýsar.Sondaı-aq kelissóz barysynda taraptar jahandyq jáne óńirlik kún tártibindegi ózekti máseleler boıynsha jan-jaqty pikir almasty.