Atyraý oblysyndaǵy «Ulttyq ındýstrııalyq munaı-hımııa tehnoparki» arnaıy ekonomıkalyq aımaǵynda elimizdegi óńdeý ónerkásibindegi eń aýqymdy jobalardyń biri – polıetılen óndiretin «Sılleno» zaýytynyń alǵashqy qazyǵy qaǵyldy. Saltanatty is-sharaǵa oblys ákimi Serik Shápkenov, «QazMunaıGaz» UK» AQ basqarma tóraǵasy Ashat Hasenov, Energetıka vıse-mınıstri Qudaıbergen Arymbek, SIBÝR basqarma múshesi-atqarýshy dırektory Pavel Lıahovıch, «Sinopec» kompanııasynyń aǵa vıse-prezıdenti Van Tao qatysyp, alǵashqy qadany qaǵý rásimin jasady.
QMG basshysy Ashat Hasenov aýqymdy joba Memleket basshysy Qasym-Jomart Toqaevtyń elimizdiń batysynda munaı-gaz-hımııa ónerkásibi klasterin damytý jónindegi tapsyrmasy aıasynda júzege asyrylyp jatqanyn atap ótti.
– Zaýyt ónerkásip salalarynda qoldanylatyn polıetılenniń jıyrmadan asa túrin shyǵarýǵa qaýqarly. Joba qurylys kezeńiniń ózinde-aq ulttyq ekonomıkaǵa mýltıplıkatıvti oń áserin tıgizip, elimizdiń shıkizattyq emes eksportyn arttyrýǵa yqpal etedi. «Sılleno» ónimderi eldegi polıetılen ımportynyń 90%-yn almastyra alady, – dedi A.Hasenov.
Ulttyq statıstıka bıýrosynyń málimetinshe, 2024 jyly otandyq polıetılen naryǵy shamamen 300 myń tonnaǵa jetti. Sarapshylardyń baǵalaýynsha, 2035 jylǵa deıin bul kórsetkish 400 myń tonnaǵa deıin ósýi múmkin. Endeshe, jergilikti tutynýshylardyń suranysyn «Sılleno» qamtamasyz etýge daıyn. «Sılleno» JShS bas dırektory Jandos Qaırgeldi balamasy joq biregeı jobany júzege asyrý barysyna toqtaldy.
– Búgin Úkimet pen aksıonerlerdiń qoldaýymen negizgi qurylys jumystaryna qadam basyp otyrmyz. «Sılleno» – otandyq óńdeý ónerkásibindegi iri jobalardyń biri. Jylyna 1,25 mln tonna polıetılen óndiretin jáne ınvestısııa kólemi 7 mlrd dollardy quraıtyn zaýyt qurylysyn 2028 jyly aıaqtap, óndiristi 2029 jyly iske qosý josparlanyp otyr, – deıdi.
Jobanyń ishki jalpy ónimge qosatyn úlesi shamamen 0,9-1% deńgeıinde baǵalanyp otyr. Qurylys kezinde 8 myńnan astam, al zaýyt iske qosylǵanda 800-ge jýyq turaqty jumys orny ashylady. Sondaı-aq qurylyspen birge, orta jáne joǵary býyn maman daıarlaý isi de qatar júredi. Máselen, ıspanııalyq merdiger mekeme jyl saıyn jergilikti 30 stýdentti oqytyp shyǵarmaq.
Jobaǵa álemniń eń ozyq jańa tehnologııalary tartylady. Bolashaq keshen amerıkalyq «Lummus» kompanııasynyń tehnologııasymen etılen óndirýge arnalǵan pırolız qondyrǵysynan jáne «Chevron Phillips Chemical», «Univation Technologies» (AQSh) tehnologııalarynyń kómegimen etılendi polımerleý qondyrǵylarynan, sondaı-aq, «Axens» (Fransııa) tehnologııasymen salynatyn býten qondyrǵysynan turady. Qurylys alańyndaǵy alǵashqy daıyndyq jumystary pırolız qondyrǵysynan bastaldy. Onyń qurylysyn EPC-merdiger retinde «Tecnicas Reunidas» (Ispanııa) «Sinopec Engineering Incorporation» (Qytaı) kompanııasymen birlesip júrgizedi.
— Osylaısha, elimizdiń batys óńiri munaı-gaz-hımııa klasterine aınalmaq. Memleket basshysy aıtyp ótkendeı, jobalardy tek júzege asyryp qoımaı, sonyń aıasynda arnaıy klasterler qurý mańyzdy. О́ıtkeni bazalyq ónim shyǵarý azdyq etedi. Polıetılennen kóptegen daıyn ónim jasap shyǵarýǵa bolady. Búginde ol – álemde eń kóp tutynatyn shıkizat ónimderiniń biri, – deıdi A.Hasenov.
Aıta keteıik, «Sılleno» kompanııasynyń aksıonerleri – QazMunaıGaz (40%), «Sinopec Overseas Investment Holding» (30%) jáne SIBÝR (30%). Zaýyt Qazaqstannyń polıetılenge degen ishki suranysyn qamtamasyz ete otyryp, ónimderin TMD elderine, Eýropa, Qytaı jáne Túrkııaǵa jetkizýdi josparlap otyr.
Amandyq SAǴYNTAIULY