Dáýletkereıdiń dáýiri

Qazaqtyń kúı ónerinde ózindik orny bar Dáýletkereı Shy­ǵaı­ulynyń týǵanyna bıyl 205 jyl tolyp otyr. Osy bir mereıli dataǵa oraı kúıshiniń týǵan jerinde ádemi is-shara ótti. Bul jıynǵa Qazaqstannyń ha­lyq ártisi, professor Aı­gúl Úlkenbaeva men «Da­ryn» Mem­lekettik jastar syıly­ǵy­nyń laýreaty Erjan Ja­men­keev arnaıy keldi.

Respýblıkalyq baıqaý­lardyń laýreaty Ádilet Jol­dy­ǵalıdyń oryndaýyndaǵy «Kórkem hanym» kúıimen bas­tal­ǵan konsert syrly da sazdy shyǵarmalar birinen soń biri áýelegen óner keshine aınaldy.

Mártebeli meıman Aıgúl Narımanqyzynyń ózi Dáý­let­­kereıdiń «Qyz aqjeleń», Dınanyń «Bulbul», Qurman­ǵazynyń «Qaıran sheshem» kúılerin birinen soń birin tartyp, kelgen jurttyń qulaq quryshyn qandyrdy. Erjan Jamenkeev oryndaǵan Dáý­let­kereıdiń «Qos ishek», Qojeke Nazarulynyń «Kúı shaqyrtqy» shyǵarmalary da kópshilikti beı-jaı qaldyrmady.

Kesh barysynda Qazaq­stan­nyń eńbek sińirgen qaı­ratkeri Nurjan Sertekov Dáý­letkereıdiń «Topan» kúıin, «Daryn» Memlekettik jastar syılyǵynyń laýreaty Jaras Satybaldıev «Kóroǵlyny», Máde­nıet salasynyń úzdigi Er­bol Ǵubaıdýllın Túr­kesh­tiń «Qońyralasyn», respýb­lı­kalyq baıqaýlardyń laý­reaty Turlyhan Ábýhanov Dáýlet­kereıdiń «Jiger» kúıin usyndy. Mádenıet salasynyń úzdikteri Asqar Kenjeǵalıev «Qosalqa» kúıiniń birinshi nusqasyn, Asylhan Qazıev «Bapas» kúıin, Ermak Moldabekov «Jeńgem súıerdi» kúmbirletti.

– HIH ǵasyrda qazaq kúı óneriniń aspanynda sónbes juldyz bolǵan Qurmanǵazy, Dáýletkereıdiń óner joly Shamǵon Qajyǵalıev, Tuıaq Shámelevtermen jalǵasty. Búginde Ermek Qazıev, Edige Nábıev aǵalarymyz aramyzda júr. Bulardyń bári de bizdiń arqa súıerimiz, ónerde úlgi tutqan jandar. О́z basym 1984 jyly Qurmanǵazy akademııalyq orkestriniń qu­ramynda Orda jerine deıin baryp edim. Osy joly baıqaǵanym – Ǵarıfolla Qurmanǵalıev atyndaǵy fılarmonııa ujymy «Atameken» óner ordasy dep atalatyn keremet ǵımaratqa ıe bolǵan eken. О́nerdiń damýyna barlyq jaǵdaı jasalypty. Sol úshin qýanyshtymyn, – deıdi Halyq ártisi Aıgúl Úlkenbaeva.

Batys Qazaqstan oblysy